Yimjung tenangzüktep ajanga Nagaland arrtsü mokongshitsü: PB Acharya

Guwahati, August 04 (TYO) : Centre aser NSCN(IM) tsüngda yimjung tenangzüktep agiba sülen Nagaland den kidangsüa aliba state temi arentaka bilemba mapang ka nung Nagaland Angh, Padmanabha Balakrishna Acharya-i Nagaland indang arrtsü nung teka aitsü sentong mali, ta metetdaktsü.
“Ni angatetba agi aser ano Ato kilonseri kü dang ashiba nung, litsü nung temelenshi kecha malitsü aser lateta aliba arrtsü nung teka maitsü. Iba tenangzükba agiba nung aliba onüktem ano memetet,” ta Acharya-i Mongulbarnü osangbener senden ka nung ashi.
Iba tenangzüktep ajanga linük ajunga ajangzüktsü, state ajak indang telongjem meraksatsü aser Nagaland nung terenlok aser yimjung bener arutsü, ta paisa shisem.
Ajisüaka, Angh-isa ashiba agi, yasüng Ato kilonser Narendra Modi tena phone ajanga jembidang tenangzüktep nung aliba onüktem indangbo mejembitep.
Nagaland nungi Armed Forces (Special Powers) Act (AFSPA) agientsü asü koda, ta osangbenertemi asüngdangdang, Acharya-i, “Security tensa tajungba akümba sülen iba onük den tanga onüktem meyipa reprangshitsü. Tarutsü anogotem nung security tensa tajungba akümba dak dang keta lir,” ta langzü.
Yashi nikongtsütsü NSCN(IM)-i yimjung tenangzüktep agiba sülen ano Nagaland nung telungpur telok pungu lir, ta paisa shisem.
“Teti atema yimjung alitsü atema mapa tenzükogo ta ni amanger. Tanü nungi asenoki terenlok atema jaja tenzüktsü. Tanga teloktemi tensa angateter tangatettep kati arutsü ta ni imlar,” ta Nagaland Angh-isa metetdaktsü.
NSCN(IM) aser Centre na tsüngda küm aika tenangzükba magiteti arubaji telok anapronglai kati ka dak temulung melemtetba ajanga liasü, ta Acharya-isa ashi.
Paisa, “Kodangsa tiyongtsü nung ia jembir shimdir, nübortemi iba jagi maparen atsülangdaktsür ta bilem, saka tangbo nübortemi RN Ravi shimba pela agizük. Temulung melemtetba agi temulunglemtetba melenogo” ta ashi.
“Modiji dak lenisüba sempet tajung aser North East atema mangdang tulu aliba den ano Naga khuret atema yimtenren tenangzükba aser temulungtetba ajanga yimjung tenangzüktep agitetogo. Yashi tenangzüktep nung sign asübaji kü taküm nung tepelatiba mapang ka liasü” ta paisa shisem.
Osangbenertemi Angh dang NSCN(K) indang asüngdangdang, “parnoki ceasefire tenangzükba agien anungji sorkari ceasefire melii telok shinga dena mejembitsü” ta pai langzü.