Yimjung Tenangzüktep ajanga yimjung aser terenlok angutsü imlar: TR Zeliang

Kohima, August 15 (TYO) : India aser NSCN(IM) tsüngda Yimjung Tenangzüktep agiba pelashishia agizüker aser ‘framework agreement’ magidang tamasa Naga nunger den asüngdangyatsü imlar, ta Chief Minister T R Zeliang-i tanü metetdaktsü.
Tesüiba küm 60 tema Naga yimten tebilemtsü khuret ya lokti aser yimtenren inyaksangshi ajak nung tongti süa aruogo aser 1963 nung Nagaland state kümtetba sülen nungi yimten telok aser sorkar ajak teinyaktsü asalendong nung iba onük ya tongtipangba liasü, ta T R Zeliang-i ashi.
Tanü Secretariat Plaza, Kohima nung 69 buba Independence Day sentong nung Nagaland Chief minister-i iba onük jembi.
Naga nunger ajaki shilem agia inyakba nung süngjang atangba angudang kanga pelar aser August 3 nü India sorkar o NSCN(IM) tsüngda Yimjung Tenangzüktep agiba pelashishia agizüker, ta paisa metetdaktsü.
“Tesüiba küm 17 tashi Naga yimten tebilemtsü onük jembiyonga aruba nung asenok ajaki shilem agiba ajanga iba ya atalokogo” ta TR Zeliang-i ashi.
Paisa ashiba agi, asenoki iba tenangzüktep nung kechi lir ano memetet saka asenoki iba atema Prime Minister aser India sorkar mesüra NSCN(IM) lennirtem indang mashileni mebilemtsüla saka tangatetba tajung nung yariteptsüla.
India Prime Minister Narendra Modi-i Naga nunger akhümtsübur anungji pai asenok atema tajungtiba inyaktsütsü ta asenoki imladi. Naga Peace Accord ajanga Nagaland nung kobi melii yimjung aser terenlok bener arutsütsü ta asenoki imlaa atadi, ta chief minister-isa ashi.
NSCN(K)-i ceasefire tenangzükba agienba ajanga sepaitem khasetba den Phek district nung civilian tem khasetba aser yiruba tatalokbatem ajuruogo, ajisüaka Nagaland nung law & order tensa tajungba kümogo, ta TR Zeliang-i metetdaktsü.
Pai Nagaland sorkari inyakbatem indang osang lemsatepdang, Nagaland nung Agriculture ajanga nütsüng yongsük noklang nung shilem 80 tepok mesür aser 2013-14 nungi 2014-15 tsüngda state agriculture 4.16% inlokogo, ta ashi.
India nung state tilatem rongnung food grain timba tsünütetba atema Nagaland nem Krishi Karman Award 2013-14 agütsüogo. Taoba ita Nagaland nung tzünglu aser anentsüh timtem ajanga tsünüsenbongtsü aika raksatsüba indang osang tejangja bendendar, ta TR Zeliang-i shisem.
Paisa ashiba agi, Rural Development Department kübok job card lakh 4.15 tashi agütsüogo aser 2014-15 tsüngda employment lakh 39.84 man days agütsüogo.
Health sector nunga Nagaland health Project tasenba ajanga District Hospitals 11, Community Health Centres 21, Primary Health Centres 55, Sub-Centres 90 aser yimtsüng 500 reprangtsü.
Nagaland health Project ajanga nübortem nem Health aser Nutrition services ketdangsütsü atema tashi agütsütsü, ta chief minister-isa ashi.
Power sector atema jembidang, TR Zeliang-i ashiba agi, India sorkar aser World Bank nati senotsü teyari agüja comprehensive transmission & sub transmission scheme tenzüktsü. Iba ya Central Sector Scheme ajanga agizükogo aser Power Grid Corporation of India-i inyaktsü.
Iba mapa ajanga Nagaland nung transmission aser sub transmission system nung yaritsü aser 2020 tashi nung 500 MW power ngutettsü, ta paisa ashi.
“National Institute for Transforming India (NITI) Aayog kübok Centre sorkari terenlok atema sentong atongba yanglushiogo aser iba nung state ajaki shilem agitettsü. Anungji tarutsü nung Nagaland nung alirtemi aginüba ama terenlok angutsü imlar” ta paisa metetdaktsü.