Yimjung tenangzüktep pela agizüker saka idakji keta aliba onüktem tamasa metettsüla

Kohima, August 3 (TYO) : Nagaland nung lokti tenttemi India sorkar aser NSCN-IM tsüngda yimjung tenangzüktep agiba pelaa agizükba metetdaktsüogo.
Naga Hoho tir, P. Chuba Ozukum-i ashiba agi, “Onok pelar aser tenangzükba pelashishia agizüker saka iba dak talila mejembidang, tamasa onokia tenangzüktep agiba onüktem mezüng metettsüla.”
“Naga nunger ajaki agizüktettüsa parnoki tenangzüktep agir lira, onoki pela agizüker saka yamaji mesüra iba tenangzüktepji magizüktsü” ta Eastern Nagaland Peoples’ Organisation (ENPO) tir, S Khoiwang-ia metetdaktsü.
Ano, Naga Mothers’ Association tir, Abei-u Meru-i ashiba agi, “Onoki yimjung aginür aser yimjung tenangzüktep agiba atema pelar, saka iba nung aliba onüktem mangu tashibo onoki kecha meshitettsü.”
Nagaland CM-ia pela agizüker:
NSCN (IM) den yimjung tenangzüka agiba osangji India Prime Minister-i Chief Minister, T.R. Zeliang dang tanü nikongtsütsü sangoktsü, ta Media Cell, Chief Minister’s Office sangdong ka nung metetdaktsü.
Iba tenangzüktep nung aliba onüktem ano yimjak nung memetdaktsüi lir, saka Naga Naga Civil Society temi Interlocutor, R.N. Ravi den ajurutepa sensaksemdang Naga nungertemi aginüba onüktem ashiba nung ajemdaker India sorkar aser NSCN-IM tsüngda tenangzükba agir alitsü ta amanger, ta Chief Minister-i sangdong nung shia lir.
Küm 60 tema Naga ken o lemtettsü atema meranga arur aser iba asoshi Peace Accord agiba ya mapa tajung ka lir. Iba mapa ajanga Naga nunger ajaki agizüktettsüsa teti atema telemtetba ka agitsü imlar, ta Chief minister-isa metetdaktsü.