Yimjung tezüngzüktep agia nuclear mapatong anentsü mulunga lir: N Korea

Pyongyang, January 17 (Agencies): Korean peninsula nung tensa tajungba kümdaktsütsü nükjidong nung North Korea linüki United States (US) den yimjung tezüngzüktep agitsü mulunga akümba osang ka angazükogo.
US den yimjung tezüngzüktep agiba den külemi, Washington aser South Korea na mitkartemi agiba teloktep mitkar terenemshiba sentongtem anenba melena par linükia tongpang nung amshitsü nuclear osettsüset yanglua rizüngkba maparen anentsü renemba olen ka N Korea sorkari ketdang asüba osangkakettem nung yashi, Hokolbar nü adokba osang jangjaogo.
Tan yimjung tezüngzüktep agitsü asoshi benokba olen ya US aser Seoul nati taoba mapang magizüki süidaktsüba amala onük aliba osanga jangjaogo.
“Taoba mapang benokba ama, US den yimjung tezüngzüktep agitsü aser Washington o Seoul nati agiba teloktep mitkar terenemshiba sentongtem agientsü melena, ozü Pyongyang-ia tongpang nung amshitsü nuclear osettsüsettem yanglua rizüngba maparen anentsü mulunga aliba osang sangdonger,” ta N Korea Foreign Ministry otongdar-i sangoktsüba osang KRT TV ajanga alima dang metetdaktsü.
Ajisüaka, Pyongyang-i tan benokshiba yimjung tezüngzüktep agitsü onükji US sorkari meteta mali ta US State Department otongdar, John Kirby-i metetdaktsüogo.
United Nations (UN) tetuyuba anema inyaka, N Korea-i par tongpang nung amshitsü nuclear oset 4 buba, hydrogen bomb tila ka taoba hopta tendanga kadokba sülen Korean peninsula nung tensa mejungi kümdaktsüba den külemi, alima tashi abenba linüktemi N Korea kanga sashia aitsüogo.
Pyongyang-i par nuclear mapatong tanen makai inyakba onükji US Deputy Secretary of State, Antony Blinken aser S Korea Foreign Affairs nung Vice Minister, Lim Sung-nam nati yashi Seoul yimti nung ajurutepa senden amendang benokba osanga jangjaogo.
“Ozü S Korea aser US nati aroki lungjemer Pyongyang-i bener arutsüba timtem lendong ajunga ajurutsü renema lir,” ta senden tembangba sülen Blinken-ia metetdaktsüogo.
US Congress-ia N Korea anema taoba mapang den tesashiba tenokdangba sentongtem taoba hopta benoka Pyongyang-i par nuclear tongpang osettsüset yanglutsü asoshi nungdakba senotsü lenmang shibangtsüogo.