Yimjung tezüngzüktep agiaka, Yemen nung tongpang rarabaren manener

Geneva, December 20 (Agencies): United Nations (UN)-i ayonger Yemen nung mangatettep adokba telok anati tanü, Deobar nü agi anogo 6 buba yimjung senden amentsü tenzüka lir.
Tan Switzerland kübok Geneva nung amenba Yemen yimjung sentong takok ngudaktsütsü nükjidong nung Yemen nung mangatettep adoka alirtem rong nung yimjung tezüngzüktep agia lir.
Yimjung tezüngzüktepji agiaka, Yemen sorkar pusemer aser sorkar anemer Houthi telok na tsüngda tongpang mapang shia raraba yong UN’er Special Envoy, Ismail Ould Cheikh Ahmed-i tebilemtsü akaba olen ka sangoktsüogo.
Ano külen, tan Yemen nung mangatettep adokba teloktemi tsüngdong ajurutepa yimjung senden amenba maparen pela agizükba olen ka UN Secretary General, Ban Ki-moon-ia metetdaktsüogo.
Yemen nung yimjung tezüngzüktep agiaka, Saudi Arabia arrtsülen, Yemen kübok Hajjah province nung sorkar mitkar aser Houthi telok na tsüngda tongpang raraba ajanga anogo ishika tsüngda nung nisung 68 shi asüba osang bushitetogo.
“Tan hopta tsüngda nung Houthi züngsem 40 aser sorkar mitkar züngsem 28 shi densema, ajak agi nisung 68 shi asüba aser telok anaprongla nungi nisung 15 dak tema yiruba osang jangjaogo,” ta Yemen sorkar ketdangsertemi metetdaktsü.
Ita ishika agia Saudi lushi nung tongpang raratsü terenemshiba agir Yemen sorkar mitkartemi arrtsü adena Yemen lushi telungi aita Shi’ite Houthi telok den tongpang raraba osang bushiteta lir ta parnoki ashi.
Yemen Tir, Abdu Rabu Mansour Hadi-i aniba sorkar aser sorkar anemer Houthi telok na tsüngda tongpang kanga sashia raraba ajanga tanü tashi nung ishiba agi nisung 5,700 shi asüba osang bushiteta lir.