Yimjung tezüngzüktep pusemba mesüra pu masemba mesangdong: GPRN/NSCN

Dimapur, September 18 (TYO): Tawa osang kakettem nung GPRN/NSCN-i peace accord pusemba agiener aser Tir Gen. Rtd. Khole Konyak-i sodi meshir ta adokba dak sentakba nung sangdong ka ajanga GPRN/NSCN-i MIP secretary, Moa Walling-i, GPRN/NSCN-i kodanga mesüra kecha sentong nunga India sorkar aser NSCN IM na tsüngda yimjung tezüngzüktep pusemba mesüra pu masemba sangdonga mali, ta jangjatsüogo.
Kasa sangdong ajangasa, parnok tsüngda (India sorkar aser NSCN (IM) accord mesüra tezüngzüktep agiba kecha nunga GPRN shilem mali, ”Parnok tsüngda accord mesüra tezüngzüktep agibaji parnok atema tajung süra onoki ibaji pela agizüker” anungji onok atema tebilemtsü kecha mali mesüra parnoki inyakba manemer, ta ashi.
Tir Khole-i sodi meshiba dak sentakba nung Moa Walling-i, Tir-i kodanga sodi meshiba shidi magütsü mesüra sorkar nung iba ama onük mali, iba ya tekolok tila saya ka lir, koba ajanga Naga onük nung tebenja adokdaktsütsü meranger, mesüra telok kari züngsem tsüngda temulung melemtep aser mangatettep adokdaktsütsü atema inyaker, ta ashi.
“Ajisüaka iba ama tekolok tilar sentong yagi GPRN/NSCN telongjem nung tamakok maludaktsütsü, onok anema iba ama osang prokshiba aser tasa tamajung asaba ya onoki meteta lir, sorkari junga bushisüngdangtsü aser GPRN/NSCN tenüng menüktsütsü merangertem nem temerenshi tulu agütsütsü,” ta kasa sangdong ajanga ashi.

You must be logged in to post a comment Login