YIMJUNG YANGLURTEM TEMOATSÜBA : (Kechiaser parnok dang Tsüngrem chirtem ta ajatsü. Mathi-5:9 )

~ A.M. TOSHI JAMIR, Director (retired)
Higher Education, Nagaland, Lengrijan, Dimapur.

Alemli tetsü tebou mapang nungi tanü tashi ASEN LIMA nung yimtsüng-temi akangjungshitepa teti asoshi yimjung yangluba nung shilem tajung agiba asenok ajaki angashia aser ngua arudagi. Iba maparen-len ano nüburtem tali ajungmesotsü asoshi süia aruba küm semershi mapang osang kaket nung adokba akokba tashi bendena zülur. Akidang nungi yimjung yangluba mapa tajung yim shirnokisa inyakogo (yangi zülusema alir aser malirtem ajak), parnok nem tenungsang agüja iba ocet ya parnok nüngtem nung zülur (article dedicated in appreciation).
(1) MAY 13 & 14 th , 2011: LONGKHUM JUNGLI KHEL (Mokokchung district) ASER PANGTI YONGDONG KHEL (Wokha district) na alemli mapang nung anemtepa arur külen Yisu yimsu aruba tenung nung 1933 küm ajurutepa tai tokteper yimjung yanglu. Ibaji bilemtettsu asoshi küm ter shia yim ana nungi Mepu anaji ajurutepa Tsüngrem tenüng sanga benjung lia pelateper senshir. Iba sentongji 13 & 14 th May,2011 anogo nung Longkhum yimdak agi.Source:Morung Express,Dimapur, dated 17.05.2012.
(2) APRIL 10 th , 2011: PHIRO yim (Lotha nunger,Wokha district) aser PHENSüNYU yim (Rengma nunger, Kohima district) na tsüngda tsükchitepa arur 1961 küm yimjung yanglu.Küm tenemshi suir külen ano 10.04.2011 nung akidang yimjung yangluba bilemteta Phiro yimdak nisung merirjang aika sentepa sarasadema benjung yanglua among. Source:Morung Express ,Dimapur, dated 11.04.2011.
(3) OCTOBER 2 nd 1989: CHANGTONGYA yim (Mokokchung district) aser YACHEM yim (Longleng district) na yimjung yangluba anogo:Yim ana ya Tzüla tzü nung jaka ka atema tetsü tebou mapang nungi putu aika tesendaktep raksar liyonga aru.YACHEM yimdak Revival akadang Tsungremi nuburtemden jembi aser Rev.Alem-meren (Director,NMM & Revival Speaker) lennisüba /teyari ajanga 02.10.1989 anogo nung yim ana tsüngda aibelenbatemji tatok meshitep/agütsütep aser Yisu maru tashi yimjung nung alitsü asoshi yim anatsülen nungi Barrick,Gaon Bura aser Pastor-temi zülutepa ayu.Küm 25 abensaba sentong 2014 nung agia liasü. Source:Declaration of Peace, dt.02.10.1989 & Changtongya Yachem Peace Covenant Silver Jubilee, dt.18 & 19th December 2014 & Local Papers.
(4) 2009: CHUCHUYIMPANG yim (Mokokchung district) aser LONGRA yim ( Tuensang district ) na yimjung yangluba kum: Item yim ana ya tetsü tebou mapang nungi tsükchitepa aru, saka 2009 Chuchuyimpang Baptist Arogo küm noklangka abensaba (Centenary) amongtsü renemshiba nüngtem nung Longra yim den Yisu tenung nung, teti asoshi tai nangzüktepa tokteper yimjung yanglu. Source:Morung Express, Dimapur,dt.16.01.2012 & others.
(5) AUGUST 4 th 2010: CHANGTONGYA BAPTIST CHURCH (CBC) aser NAGALAND CHRISTIAN REVIVAL CHURCH CHANGTONGYA (NCRCC) na tsüngda NCRCC tenla kidang telongjem sentep ka agia liasü. Tesüiba küm tenem (50) tejaklen CBC züngsem temi NCRCC züngsem tajung aika reshikangshiba atema nangzüka tatok meshiba ama CBC nem tatokji agütsü. Source:Tir Yimyim, dt.7 & 8th August 2010.
(6) AUGUST 4 th 2010: CHANGTONGYA BAPTIST CHURCH (CBC) aser CHANGTONGYA YIMSEN BAPTIST CHURCH (CYBC): 17th October 1921 küm Changtongya yim tasen küma aiba mapang nungi tanü tashi CBC-i CYBC anema kechisa aibelena lir item atema tatok nangzük. Ano CYBC-ia CBC anema kechisa aibelena ali item ajak atema tatok nangzük.Tebu ,Techir, aser Tanela temeshi tenüng nung tai tokteper külen tezüluba nung ayu. Source:Tir Yimyim, Dimapur,dt.7&8 th August 2010.
(7) APRIL 1st,2011: THSINGER yim (Kiphire district ) aser LUTHSUMI yim (Zunheboto district) : Item yim ana tsüngda tetsü tebou mapang nungi leptep-tsüngtepa aru. Saka Khristan yimsü arur külen tesülen 01.04.2011 anogo nung Thsinger Baptist Arogo tenla kidang Yisu Khrista tenüng nung tai nangzüktepa tatok agütsütep. Source:Nagaland Post,Dimapur, dt.25.04.2011.
(8) EPTEMBER 25th 2011: LONGSA yim (Mokokchung district) aser KHAR yim na akangjungshitepba anogo: Akhi tetsü tebou mapang yim ana tsüngda tsükchitepa/anemtepa aruba 25.09.2011 anogo nung Longsa Baptist Arogo tenla kidang; Longsa Yimten,Arogo aser Khar Yimten,Arogo ,Yisu Khrista tenüng nung tatok nangzükteper tai toktepa liasu. Khar Baptist Arogo Centenary 2012 küm amongtsü lia iba putepshiba sentong ya kanga takok ngua agia liasü.Source:Tir Yimyim, Dimapur, dt 26.09.2011.
(9) FEBRUARY 5th, 2012: MOLUNGKIMONG aser KHAR yim na tsüngda yimjung yangluba anogo:Tetsü tebou mapang nung tim masüba mapa inyakba, temulung yirudaktsüba,anemtepa-a naroküm bushitepa aru.Saka Yisu tenüng nung Molungkimong Yimten , Arogo aser Khar Yimten, Arogo na tsüngda item aibelenbatemji ajak tatok agutsüteper Yisu maru tashi yimjung nung teka amteper tejakleni aotsü asoshi telemtetba agia ayu. Source:Tir Yimyim, dt.07.02.2012.
(10) MAY 27 ; JUNE 10; JUNE 24th , 2012: LONGSA yim-i (Mokokchung district) MOKOKCHUNG ,MONGSENYIMTI, aser KHENSA yim den putepshiba sentong tajung agiba anogotem: Longsa Arogo 2016 küm Centenary amongtsü renemshiba nüngtem nung yim balala sema Yimten aser Baptist Arogo-tem den ajurutep.Oda akhi tetsü tebou tamang tia nung alidang yim o yim na tsüngda tashiyim mapa inyakba, noknü ajanga konang naroküm bushitepa aruba ,anemtepa aruba temenentem ajak nangzüktepa taitoktep. May 27 nü Mokokchung Yimten / Arogo den; June 10 nü Mongsenyimti Yimten / Arogo den; aser June 24 nü Khensa Yimten/Arogo den ajurutepa oda Yisu maru tashi teka amteper yimjung nung tejakleni aotsü asoshi telemtetba agia liasü. Iba kasa putepshiba sentong ya July ita 22 (2012) anogo nung Longjang yimdak alitsu ta Longsa Baptist Arogo-i sangdonga liasu. Source:Tiryimyim,Dimapur, dt.25.06.2012.
(11) OCTOBER 5th, 2012 : CHUCHUYIMPANG aser CHUCHUYIMLANG yim ana lungjemshiba anogo:Yim ana-ya Chuchuyimpang Baptist Tenla kidang sentong tajung ka agia liasü. Akhidang tsürabur mapang aibelen aser mabensa mapa inyakba ajak nangzüktepa Yisu tenüng nung kati ka nem tatok agutsütepba tamaitsü kuli sütepa liasü. Yim ana tsüngda putu 13 tashi tesendaktep pilar liasü saka putu 14 buba nung longjemshir ta, Tsüngrem tenüng sanga liasü. Source:Tir Yimyim, dt.06.10.2012.
(12) OCTOBER 11th, 2014: NOSWE kidong (clan) aser SOTHU kidong (Clan); Viswema yimtsüng nungi (Kohima district):Küm noklang ka shi iba kidong ana ya tsürabur mapang nungi ali (land) raktepba anemtepa aru. 1925 küm British nunger yimsüsür J.P.Mills-i iba ken-o ya angadang saka kecha telemtetba tajung kati marutet. India lima nung Supreme Court (O Bendangdak tematiba) tashi orr kecha mesütet. Ano küm metsü shi süidaktsür kulen tesüsa 2013 küm kidong ana tsüngda, Tsüngrem tenüng nung atsü-anem kateper telemtetba tajung kati aru. Ali jagi aiben tereprangi or kulen ana küma kesasa lemdang (equally divided) aser yimjung nung lia aotsü asoshi 11.10.2014 anogo nung lemteta ayu. Source:Morung Express,Dimapur, dt.12.10.2014.
(13) JANUARY 23rd 2015: CHANGTONGYA KOSASANGER PUTU aser YAONGYIMSEN KOSASANGER PUTU yimjung yangluba anogo: Yimti ana tsüngda tsürabur mapang nungi lia arudang tasen, tako kechisa liasü item ajak tai toktepa amadoker 23.01.2015 anogo nungi Yisu Khrista tanaben maru tashi yimjung nung alitsü asoshi Tsüngrem tenüng nung azüngashi. Yaongyimsen Ong Salang nung iba ya yim ana nungi Putu Yimsüsür-tem aser ano Baptist Arogo Pastor ana külemi kuli sutepa ayu.
(14) NOVEMBER 28th ,2015: JAPAN nunger aser NAGA nunger na tsüngda yimjung yangluba anogo: Tanabuba Alima Rara (World War -II) sülen küm 71 shi süir külen Japan nunger aser Naga nunger tsüngda, Kohima nung 28.11.2015 anogo nung yimjung yangluogo. April 4, 1944 nungi tenzüka Tanabuba Alima Rara mapang Japan nungeri India amaktsü merang, saka Kohima tongpang rara nung parnoki (Japanese) tamakok angu. Honibar 28th November 2015 anogo nung Khedi Baptist Church, Kohima nung Nagaland Baptist Church Council aser All Japan Revival Mission kübok telok anapronglai tatok meshitepba agütsütep. Naga aser Japan nunger tsüngda tai tongloktsütepa aruba atema yimjung yangluba sentong ya agia liasü. Iba sentong-ya Baptist, Pentecostal, Revival aser Assembly of God teloktemi longjemer ayongzük. Source:Tir Yimyim, Dimapur dt.29.10.2015.
(15) FEBRUARY 13th & APRIL 14,15 , 2016: CHUNGTIA aser CHUCHUYIMLANG yim ana tsüngda YIMJUNG AK Sü: Alemli tsürabur mapang mangko konang aser naroküm bushiba mapang nung Chungtia aser Chuchuyimlang tsüngda enki shibanger aliba,13.02.2016 anogo nung Chungtia yimdak yimti ana nungi Yimsüsür mena lemtetba ama April 14, 15, 2016 anogo nung Yimjung Ak Sü ta jar kanga longsoa liogo. Anungji tsürabur mapang kechisa aibelena ali itemji kati ka dang Tsungrem tenüng nung tatok agütsüteper tempang. Source:Tir Yimyim,Dimapur, dt.20.04.2016.
(16) FEBRUARY 24th 2016 : PONGO yim (Longleng district) aser LONGCHANG yim (Mon district):Kum lir-trok (46) tashi yim ana tsüngda ali (land) atema meputepi aruba tatemsa 24.02.2016 anogo nung telemtetba tajung ka agir kulen teti atema yimjung nung alitsü tai toktepa, zuluteper, sarasademer tembang. Court nung case agüja aliba ajak meyipa bener arutsü telemtetba agi. Iba sentong nung talisa Arogo, Yimten, Sorkar, ENPO tanishirtem, aser ano tangar tongtibang nisung aika arua shilem agia liasu. Source:Nagaland Post,Dimapur,dt.25.02.2016.
17) SEPTEMBER 25th 2016: WAROMUNG aser ALIBA yim ana tsüngda tai tokteper yimjung yangluba anogo: Tsungrem osangtajung marui aliba mapang tetsü tebou mapang Waromung aser Aliba na tsüngda koba mangatettep/tsükchitep lia aru, aji majung ta angateta 25.09.2016 anogo nung tatok meshia aru nung Aliba nungeri Waromung nunger nem tatok agutsu. Iba ya yim ana nungi Putu Yimsüsürtem, Pastor, Waromung Baptist Arogo aser Pastor, Aliba Baptist Arogo nungertemi tezüluba nung renema ayu. Source:Tir Yimyim, dt.08.10.2016.
(18) SEPTEMBER 23rd, 2018: Anogo nung MONGCHEN aser DIBUIA yim na akangjungshitep. Tejen putu nung yim ana tsüngda kechi aibelen liasü, iba atema yim anaprongla nungi Council Chairman-i anir Yimsüsürtem, Pastor-i anir Arogo tenzükertem; Mongchen Baptist Arogo nung longjema tatok meshiba aser tatok agütsütepba sentong Tsüngrem tadenba nung takok ngua agia liasü. Source:Tir Yimyim,Dimapur, dt.24.09.2018.
ASEN LIMA nung tetsü tebou mapang nungi yim aika tangar yim den tesendaktep raksar liyonga aru ta tamalen shia aliba tatalokba ajanga metetter. Asenok dangi OSANGTAJUNG arua amang, saka ano tejen temenentem aika meindoki temulung nung rizünga yur tsükchitepa liyonga aruba, talisa Arogo teyari ajanga endokdaktsür putepshidaktsüba angur. Tangar dang nungi ozü yimer tajungba, temetetba, tashiba, takaba ta asüküma (pride and ego) bilemba shisatsü (mindset) joko khenyongi endok jungdisü ? Oda ASEN LIMA dang jungerbo tarutsü lanur putu tenüng nung ozü yimeri ajemalua tila kümer tera akoksadi aser maksü arema (give and take / make some sacrifices) telemtetba tatembang kati arudi ta tamasapurtemi inyakba asenoki ngua aruogo. Item tatalokbatem ajanga nüburtem tali ajungmesotsüla masu no? Tesüiba mapang yimtsüng-o-yimtsüng na putepshidaktsüba nung Pastor-temi anir Arogo aikati tongti shilem agia inyaka aruba ama ano maneni Putu Yimsüsür aser Arogo longjemer inyakra ASEN LIMA tebur tajungba makümtsü no ?