Yimkhiung kin longkak aitba manener; tanü cabinet senden amentsü

Shamator district agüjang ta sorkar nem takhangba agüja Yimkhiung Tribal Council ajanga Brehostibarnü Shamator jila nung longkak aitba mapang tangokba noksa ka yangi angur. Iba sentong nung tanur-tain, tetsür-tebur ajaki shilem agia liasü.

Kohima, Aenjeti/January 06 (TYO): Tang aliba Tuensang district nungi Shamator district temeja ka meshia Yimkhiung Tribal Council (YTC) longkak aitba manener, aser Brehostibarnüa Shamator jila nung longkak aitba sentong ka agia liasü, aser iba ken o jembitsü atema state cabinet pur Hokulbarnü senden ka amentsü sentong lir.

Sorkari nangzükba ama Shamator nem district temeja ka magütsüba asoshi state sorkar dang tejashi sayua YTC ajanga par tawabangba kübok aliba tesemtem nung January 3 nungi tenzüka anepdang 9:00 ako nungi anüngdang 12:00 ako tashi tesunep nung longkak aitba sentong agiyonga arur, ta YTC tongti zülur S Tsuyihba-i ashi.Brehostibarnüa YTC ajanga Shamator jila nung longkak aitba sentong ka ayongzüka liasü, kong tanur-tain, tetsür-tebur adenshia Shamator district mechiba placards aser banner amer jaja.

Parnoki sorkar dang nüburtem dang nangzükba ama inyakang ta takhangba agüja par oshi nung yimyim ayima aser ken tena liasü.

Likimro Hydro Electric Project (LHEP) shibanga aliba lapokjang ta ADC ajanga shidi züluba nung telangzüba agütsüba mapang, state sorkari Yimkhiung kin dang pezü-pelem yimya sayua tiazü nangzükba ajanga Yimkhiung nübur molung yirutsü aser mezüngmeshi, anungji YTC ajanga LHEP shibangtsü densema mapang telatet makai nüburtemi kongkak aittsü ayongzük, ta ashi.

Mapa shidak meinyak tashi LHEP ya shibanga alitsü, ta parnoki nenshia ashi. Kasa mapang nüburtem tejangraba nung ajemdaker YTC ajanga taoba mapang sangdong ka nung NDPP party lenirtem aser local MLA S Keoshu nungertem January 7 tashinung mapa nungi anentsü metetdaktsüba agiener, ta ashi.

January 7 nü state cabinet senden amentsü ta MLA Keoshu-i YTC indang Executive Chairman nem osang agütsüba nung ajemdaker iba telemtetba ya agia liasü.

Ajisüaka January 7 cabinet senden nung YTC ajanga Shamator district meshiba ama sorkari magütsüra, January 8 nungi tenzüka taoba mapang lemteta alibatem mapa kuma inyaktsü, ta YTC vice president, H Hanji-i metetdaktsü.