Yimkong asoshi

Dimapur nung Langpangkong Senso Telongjem golden jubilee amongba tenüng nung Dimapur yimti nung oliorartem tzüratsüponga senzüdang anisüngzüktsü atema angati tzü tajemtsü angudak aser yimti topur ajungtsüsa anütettsü tongshi tulu aser talangka yanglutsübaji yimkong asoshi mapa tajung ka inyaktsür asütsü. Atangji, iba mapaji Langpangkong nunger mapa masü Aortem mapa asütsü, anungji Dimapur nung alir Aortemi Dimapur asoshi inyaktsüba mapa tajung ka asütsü. Aiben asenoki asen kija ajungtsü aser ajangzüktsü asoshi dang bilemer, idangji yimkong ajungtsü aser ajangzüktsü asoshi inyaktsü rajema marur. Joko, Mokokchung district nung aliba yimtem dang asenok yim masü saka Dimapur yimti ya asen yimti kümogo. Dimapur nung nütsüng lakh asem shi lir aser item nütsüng yongsüktem rongnung Aor nütsüngyongsük meyirijang tenem dak tali asütsü. Dimapur lima ya alima tulu aser yangji kinükkisang ajak nung Aotsür Aortem lir. Itemji kodang tangar kintem den medemdangdir tsümartem nütsüng sülenbo Naga kintem rongnungbo Aor nütsüng kanga agia teimba asütsü. Ibaji Tsüngremi Aor nem moatsüba tashi aser temoatsütem lir. Item temoatsütemji kodang asenoki jungjunga züngdanga Tsüngrem nem tenüngsang agütsü tenzükdir, asenoki asen kija asoshi dang masü saka yimkong asoshi mapa tajung tulu inyaktsü apitettsü. Joko, Dimapur nung arua alir Aortem yabo pei tsürabur yimtakibo meyipa maotsü. Atangji, tanngbo asenok aika benjongbentsü nung tsürabur yimtak oa amonger. Aser ano talisa, election mapangbo Dimapur azüngazünga toktsür pei yimtsüngi omar. Iba jagi tang tashi asenoki Dimapur yabo bendang lima saka pei tsürabur yimtsüngtemang pei yim amai bilemer. Aji oda, pei tsürabur yimtakbo talidak kia maka saka Dimapur nungbo pei kidang alir, saka asenoki Dimapur masü pei tsürabur yimtsüngtemjiang pei yim ama bilemer. Dimapur nung pei ki yanglua lir aser sür külen temanga Dimapur nung dang aremtsü, ajisüaka asenok aikati Dimapur nungbo asen nüngshi asütsüsa longa kata azünga meyutsüner. Tangar kintembo Dimapur ya asenok nem moatsüba asen lima, anungji kibur küma jungjunga anepalutsüla ta asüba tangatetba kati yaktayongi aruogo. Kasa Dimapur nung pei kidang alir saka tangari ibai ozü lima ta bilemdang asenokibo bendang lima ta bilemer, tangar o asen na tetesüngdaji ibaji lir. Joko, Dimapur ya bendang lima masü saka ozü lima ta kibur küma bilemtsü aser tetshitsü atema Aotsür Aoertemi Dimapur nung yimkong ajungtsü atema tesem tesem nung teti atema mapa tajung inyaktsütsü bilemtsüla. Dimapur ajungtsü atemabo asen kima ajanga aoba kilentsüa memerüktsüner saka Dimapur tenüng nungbo akok tashi tajangzük aginer ta asüba nisung aika lir. Iba jagi tanü Dimapur yimti ya tangar yimti mesüka topur junga alitsülaba agi tamajungba dang küma aoba angur. Yimti ka topur junga ayutsübaji tangalen nungi arua inyaktsütsü masü aser government ozüng agia makoktsü saka nübortemi pei lima aser pei yimti meimba shisatsü alitsüla. Atangji, Jubilee tenüng nung pei kija ajangzüktsü atema bara ki ka yanglutsü melena yimkong ajangzüktsüsa rongsen aser nübo tenla tulu agüja yimti tiyong nung anütettsü tongshi den külemi tzü tajemtsü tajung angati angutsüsa yanglutsüba jagi, asenok dak temeim aser awashi aketba shisatsü tajung ka sayur. Iba ama yimkong tenla agi kodang asenoki yimkong ajungtsü mapa tenzükdir, idak nung jagi Naga nunger meimteptsü aser longjemtsü tenzüktsü. Joko, Dimapur nung asenoki Jubilee nüngo yangluba jagi, ya ozü lima ta sayur aser iba limaji tali meima anepalutsü ayongzüker. Dimapur ya asen lima kümogo, anungji asenokbo asen Dimapur lima nung kin balala nungi adenshia alirtemia Dimapur lima ya Naga nunger  ajak lima ta bilema alitsüsa tang amai sentong tapu balala ayonga Dimapur tajungba akümtsü asoshi inyaktsüla. Asenok Dimapur nung aliba ya tamongi aru masü saka talii aru ta bilema, Dimapur topur ajungtsü aser nübortem anisüngzüktsü asoshi Dimapur tesem ajaklen mapa tajung maneni inyaka aotsüsa asenok rongnung shisalemsatepa ajungshitepdi.