Yimozülurtemi shisabolua bilemer

Dimapur, June 24 (TYO) : Yasüng Brehostibar aonung 9:02 ako shi nung mejangjatetba nisung kari Nagaland Post kiküm anasa injang khatokba mapa jagi temulung animesüngzükdaktsüi kümogo ta shisabolua bilemba osang ka Nagaland nung anogo shi adokba osangkakettem nung yimozülurtemi metetdaktsüogo.
Iba ama tatalokba kuliji bushiteta putettsüsa police-i inyaktsü tamang akar aser sorkaria state nung nübortem tetsübu melii sademsadema alitsüsa tapet mapa inyaktsü nüngdaker ta yimozülurtemisa metetdaktsü.
Osangkakettem adokba maparen nung tetsübu tarendak melii inyaktettsüsa tensa tia yanglutetbaji nübortem tetsübu melii junga alitsüsa inyakba den sendaktepa lir ta parnokisa metetdaktsü.
Osangkaket adokba maparen nung sademsadema meinyakdaktsütsü asoshi tsübudakja nokdangba mapatem agi nübortemi mulungba yimten aser lokti inyakyim tamendakdakang raksatsütsü alinungji, Nagalang sorkari state nung osangbenertem sademsadema inyaktsüsa nüngdak mapatem inyaktsütsü imlar ta Nagaland nung yimozülurtem rongnung Morung Express yimozülur Wb.Akum Longchari, Eastern Mirror Yimozülur Wb.Wapong Longkumer, Capi yimozülur Wb.M.Kire aser Tir Yimyim yimozülur Wb.K.Temjen Jamir nungertemi metetdaktsü.