Yimozülutsü nüjisoji shisa kaa amshitsüla: Modi

Chennai, November 6 (Agencies): Yimozülutsü nüjiso ya public ajungtsü atema shisa kaa amshitsüla aser media-i tashishitsü melii inyaksangshitsü atema talila awaloka oa mapa inyaktsüla, ta Prime Minister Narendra Modi-i tanü ashi.
“Zülutsü indang nüjiso nung tai zülütsü indang nüjisobo maden. Press dang Fourth Estate ta ajar aser ibaji tashi lir, saka tashiji alia amshira, ibaji ozüng alema inyakba mapa ka asütsü” ta Modi-isa ashi.
Hombar nü Madras University Centenary Auditorium nung Tamil oshi nung adokba Daily Thanthi küm 75 ajungba benjungmung nung Modi-i iba o jembi.
Sorkar mesüra ozüng amertem den kasa media-ia nübortem atema inyaktsüla, ta paisa shisem.
“Media ajanga loktiliba nung temelenshi bener arur, anungji osangkakettemi alima tsüngsang-mopung melenshiba indang osang prokshitsüla” ta Modi-i ayongzük.
Tanü, osangkakettemi osang dang magütsür, saka loktiliba melenshitsü atema tangatetba agütsür aser lenmang sayur. Iba jagi asenoki media dang democracy nung tongshi pezübuba ta ajar” ta Prime minister-isa ashi.
“Media kiburji nija nisungtem asütsü akok saka iba ya public tenzüktsü atema lir. Media-i tashiyim medeni timi dang temelenshi bener aruteter ta shisakartemi ashir” ta Modi-isa shisem.