Yimsü anema kiralongraba

Taoba Deobar anepdang Sri Lanka nung Yisu shia aruba anogo bilemtetba sentong agia alidang tenlaki asem tashi nung kiralongrartemi pei mang agi bomb kümer oa pokloktsüba lendongtem  jagi tamangba yimsü anema inyaka ta jakdaka sayur. Alima nung azü tokshia ali raktepba mesüra yimten tashi toktepba tongpang rara aika lir, item ajakji majung anungji anentsüla, saka item tongpang raratem dang nungi kanga agia tamajungtibaji tamangba yimsü anema tashiyim inyakba mapa ya asütsü. Koba tamangba yimsü südir süaka, tamangba yimsü agibo kati ka meimteptsü aser putepa alitsü sayur, anungji tamangba yimsü ka tenüng nung tanga tamangba yimsü amangertem samatsütsüsa inyakbaji Tsüngrem aser nisung tsüngdang temeten angutsüba mapa ka masütsü. Tang mapang tatsüka tsüngda US nung Pittsburgh Synagogue aser New Zealand nung  Christchurch Mosque ama nung aser tang Sri Lanka nung  amangba purtem tekülemdak külema alidang kiralongrartemi tai maketba amangba purtem aika taküm samatsütsüsa inyakbaji kar asoshi dang masü saka alima ajak asoshi tebilemtsü tuluka kümogo. Iba amai alima tesem balala nung tetsübutsü kiralongraba mapatem atalokdang, tanüngba alima kintemi taitsüba, jashiba aser mangyim jashi lemsatepba osang lemsatepba dak alaka kin aikati pei daka ataloktsü amai shishia mebilemer. Ashiko, America nung kiralongraba mapatem atalokdang New Zealand, Sri Langka mesüra India limatem amai kasa lendongji pei lima nunga ataloktsü südi ta kanga shisaboluabo mebilemka südi. Atangji, kiralongraba mapa nokdangtsüba ya alima kin ka kija mapa masü tabo jembir saka mapa agi alima kintem ajak külemi longjemer inyakbabo kangabo mangur, ibayongji alima kintem rongnung ka khen, ka khen ta yashi yakanü ajuruba lendong ama kiralongrar ket nung ajurur. Ashi, tanga limatem toktsür New Zealand aser Sri Lanka limatem ama nungbo tan atalokba lendong ama ataloktsübo shingaia meimla anungji matalokla. Joko, tamangba yimsü kati tanga tamangba yimsü amangertem meimtsüba dak alaka sempateptsüsabo shingaia mejembitsüla aser meinyaktsüla. Talisa, India ama tamangba yimsü ajak sademsadema amangtsü koka alidak, yimten yimsüsürtemi tamangba yimsü tenüng nung nübortem rongnung tsükchiteptsüsa mejembitsüla aser meinyaktsüla. Tan Yisu shia aruba anepdang tekülemertem sendena alidak tenla kitem nung pei mang agi bomb kümer aruagi pokloktsüba mapa jagi Khristan anemba mapa lir. Iba jagi asenoka iba ama lendong nungi jenbua mali ta kuli ka sayur. Ashiko, asenoka item ama kiralongrar mapatem anema kümdanga mita melira, asenok tenla kidanga kasa lendongji ataloktsü menua mali. Aji oda, alima tesem balala nung tamangba yimsü anema kiralongrartemi lendong mapa inyakbaji ngua yimten mitkartem dang masü saka asenok arogo nung ketdangsertema kanga saksalema alitsüsa kümogo. Atangji. Khristan-tem asoshibo mang ayangtsübaji masü saka ano item kiralongrartem jagiang Yisu temeim meteta akümtsüsa inyaktsübajiang tongtibangba asütsü. Iba tangatetba nung kiralongrartemi koba ama tetsübutsü mapa sashia inyaker, item denji toktepa Khristantemibo temeim mapa tuluba inyaka aotsü mulungtettsüla. Atangji, kiralongraba mapa kenyongi mali küma nokdangtsübajibo alima kintem yimten telongjem mapa asütsüla. Kiralongraba mapa ya alima kin kari dang ajurutsüba lendong masü mesüra Khristan, Hindu mesüra Muslim nungertemi dang ajurutsüba lendong masü, ibai alima lendong, anungji, menokdangtetra, alima nung alir ajaki ajurutsü. Tanü alima ajak asoshi tia majung, alima kin karibo kiralongraba mapatem ya maitsütetter, kechiyong kiralongrartemi parnoki aginütsüsa inyaker. Ajisüaka, ochi o kaji, kiralongraba mapa nung yagibo shinga mejenbutsü, anungji alima kintem telongjemi item alima kintem, shinroki kiralongrar pu asemer, parnok mulungjang koka jembitettsüla.