Yimsü, kin aser tangatetba ajak kasa akhümtsübutsüla: NBCC

Kohima, Luroi/August 14 (TYO): India nung sensotem dang ‘Vande Mataram’ tekong ajak atentsü atema tetuyubatem agütsüba atema Nagaland Baptist Church Council (NBCC)-i tebilemtsü kanga akar, ta NBCC General Secretary Rev. Dr. Mar Pongener aser NBCC Social  Concern Secretary, Dr. Villo Naleo nati sangdong ka ajanga metetdaktsü.

“Onoki linük maitsütem, linük meimba inyaksangshi balala aser India temzüng nung alibatem akhümtsübur. Ajisüaka linük meimbaji kangshia benokba agi masü saka pei sasa melungteta shilem agiba ajanga sayutsüla,” ta NBCC sangdong nung shia lir.

“Iba dak sendakba nung NBCC-i osangkakettem nung sangdong ka agütsüogo aser onok tangatetbaji memelenshir. Yimsü, tangatetba, yimsü dak sendakba tangatetba aser nija maitsütemji akhümtsübutsü nüngdak,” ta sangdong nung shia lir.

“India ya nübur tapu balala aika temeyoktep aika aliba linük ka lir. Iba linük ajungba ya nüburtem longjema aliba agi dang masü saka yimsü, sobaliba, kin, oshi aser tangatetba balala akhümtsübutepba agi lir. Anungji ken temeja ka, maitsü, inyaksangshi mesüra tangatetba kaji kin balala atema tetezü balala asütsü. Anungji linük aser rejutemi kanga atsüanema inyaksangshitsüla. Telongjemji ‘uniformity’ den saku masü aser linük meimbaji kangshia mebenoktsüla,” ta sangdong nung shia lir.

“NBCC-i sorkar aser ketdangertem, shisaliok rejutem, kaketshir tentettem, Arogotem, lokti tentettem aser nübur ajak dang shisa kaa, atsüanema aser linük temzüng kübok iba onük ya kanga junga bentettsü mepishir. Sensotem tebilemtsü onüktemji angadangtsüla aser tangatetba balala ajakji akhümtsübutsüla,” ta NBCC-i metetdaktsü.

“Iba denji külemi NBCC-i stakeholders ajak dang pei tangatetbaji tajungtiba nung benoktsü mepishir. Linük temaitsütem mesüra linük meimba inyaksangshi dak sendakba mangatettep adokba ajanga rara madokdaktsütsüla aser lokti nung telemsa madokdaktsütsüla,” ta NBCC-isa ayongzük.