Yimsüser Lt. Wb.T.Sentichuba den mamatetba sensaksem

~ Tiala Imchen, Dimapur.

Asür Wb.T.Sentichuba November 25th nü asüba osang angshidang nüktzü tashi agi nütetogo.Pa ama tejembinü, tejak tesangwa lemsa lemsar, tang-a kü nükla nung angur. Paji kanga dang temeim aketba aser nisung tasen dena yakta nungi meteta aliba tembar tajung ka amai, ajak den jembitetba lenir ka, Yimsüser ka aser tsürabur tajung ka liasü. Pa asübaji Naga nunger asoshi takoksa tulu lir.
Ni Ao Lima Nüktzü kaket züluba mapang 22th & 23rd Dec 2014 pa den sensaksemba kar-
Tiala – Helo uncle ..ni Tiala Imcheni jemberbako….
Senti – Aya! Tiala, na tanü ozü kidangi arutsü ta küno Aliba-i phone nung ajak shiogo. Kwi paji nung arutsü?
Tiala – Uncle tanü masüako! Ni asüngneb 10 paji nung arutsüba ang ashiako. Aser asen yimtakji kanga tatalokba aika melira, nai tang phone nung danga shiangkoto?
Senti – Aya! yah yah! Nai zülur mezülumatsüka uncle-i nüdang otsü ashitsüba lir, anungji imlibilema na asüngnep kidangi arungma no.
Tiala – Helo uncle! Yashi phone nung jembiba Tiala Imchen to nia-ko. Ni Mangmetongtsür aser Dimapur nung alir, aser kaket zülur ka, tang ni Indian Army-i grouping mapang asenok Naga nunger rishikangshiba otsü zülur.
Senti – Aya! ni na arutsü yongya-a atarbako, kidangi atur menang. Tiala! na shir chir ? oja, oba kong alir?
Tiala – Ni lajar kübu süadoker mali. Aser kübuji aluyimer ka liasü. Ni kanga tila asüdang süadok ni pa memetet, nai bo kheni memetettsü taji ana M/Yimti grouping otsüidang jump südi.
Senti – Nübu tenüng danga shiangkodo! Uncle-i nenok MTG nunger aika meteta lir. Nür kinunger danga kar shiang koto? Na tetsür kati teburia meinyaktetba mapa tulu asen Ao kin asoshi inyakba ya uncle-i nü dang kanga pelar. Aser nür kinunger ni metetba kar alinungbo parnok danga pelaba shinürbako. Nia timtema dang intetbako, Tsüngremi asenok lajar nem maongka tulu agütsüraoko. Aser ni ya nübua-to. Na ama “simple living high thinking” ni kanga meimer. Na Aor jala dang masü, Mahatma Gandhi-er jala. Nai iba kaket züluba ajanga asen Ao kin lanu putui tesüiba tsüraburi 1950’s mapang asen Naga lima asoshi koda par taküm bendanga agütsü, aser koda lia aru itemji metetsü.
Tiala – Uncle tanü na ajuruba atema kanga dang pelar. Rongseni malizüktetba senti otsü aika angazükba den nü dak jakla yimya tajung aika ajiteta ni kanga pelar. Ni na ajurutsü tera arendaka liasü saka nai kü den temeim agi rakpoka jembiba agi ni kanga pelar. Aunty asen asem sarasademer dang senshidi.
Senti – Na gari kong yua lir ?
Tiala – Ni auto nung aruago.
Senti – Amenla tetsü ! driver ba yakta jar tanutsüla Tiala meinokjang, la lenmang talang nungi asen kidangi aruba’ar. Tia no ! na kaket yakta züluzükdaktsünür aser aunty kenati-a taonung nungi na kaket mezüluzük tashi teshirangdaktsü ta sarasademtsü.
Tiala – Thanku uncle.
May ita nung kaonung pai phone nung Tiala kaket to koba tashi ka odar. Yakta dang züngner-ako ta menüa phone nung jembi. Ni pa dang, tang ASLB-i check südar ta ashi. Aya joko aji kaket kümogo. Kaket release asüdang uncle danga shiangma no, anema atara nia adentsüago. Iba sülen July ita 24 nü kaket sayaba anogo tashi pa pelaseta arua sentong nung aden. Aserbo ita pezü dang lir aoksa Pa 25th November alima nungi pila. Pa ama linük meimer aser yimsüser tajung, tebu tajung asen Ao kin nungi sotetdakjang ta Tsüngrem dang sarasademer.