Yimsüsüba tashi kümzüka ayutsü atema India-i tashi ajak amshitsü: Tir

November 28, 2015 nü Hasimsara nung President’s Standard presentation ceremony nung Tir, Pranab Mukherjee-i Indian Air Force 18th Squadron nem President’s Standard agütsüba noksa nung angur. 

Hasimara (WB), November 28 (Agencies): Honibar nü West Bengal, Alipurduar district kübok Hasimsara nung President’s Standard presentation ceremony nung jembidang Tir, Pranab Mukherjee-i, India-i yimjung atema noktaker, ajisüaka linük yimsüsüba tashi kümzüka ayutsü atemabo India-i mitkar tashi ajak amshitsü renema lir, ta ashi.
Yimjung aliba mapang aser rara aliba mapang naprongla nung anüdoklen tsütsü India nunger anüng kümzüka ayutsü atema raraba tayimtsü, combat superior MiG-27 aircraft amshir Indian Air Force (IAF) fighter aircraft squadron ana- 18th Squadron aser 22nd Squadron na nem Tir aser Armed Forces nunga Supreme Commander, Pranab Mukherjee-i President’s Standard agütsüogo.
Iba sentong nung Chief of the Air Staff, Air Chief Marshal, Arup Raha, senior air force ketdangsertem aser state sorkar ketdangsertema aika densema liasü.
IAF Squadron tem amenoka aliba tesem, Hasimara ya India-Bhutan arrtsülen lir aser parnok nem India nung north east arrtsülen anüng anüktsü mapa nunglokja lir.
Tir Pranab-i Standards agütsüba sülen jembidang pai, “Alima linüktem rongnung India maneni tashi taliba aitbaji asen armed forces ajanga lir. Asenoki yimjung atema noktakaka, pei linük yimsüsüba tashi kümzüka ayutsü atemabo asenoki tashi ajak amshitsü. Iba ama mapang ka nung uniform nung aliba asen tasütait tebur aser tetsürtemi noktaktsü ta ni tamang akar,” ta ashi.
President’s Standards ya mapang tatakzük ka nung pei nem nungloktsüba mapa kanga junga inyaktetba armed forces unit tem nem agüja arur.
1965 küm Ambala nung tentetba 18th Squadron dang ‘Flying Bullets’ ta ajar aser 1966 küm Bareilly nung tentetba 22nd Squadron dang ‘The Swifts” ta ajar, aser tangbo unit anaprongla ya Hasimara air force station nung amenoka lir.
Tiri Air Force unit ana nem tenüngsang agüja, “Nenok ajanga atangji nung linük nüma tangteter,” ta ashi.
Iba unit ana yagi 1971 küm Indo-Pak rara mapang tongtibang shilem agia liasü. Iba rara mapang 18th Squadron nungi Flying Officer, N J S Sekhon-i Pakistan nunger air force ‘Sabre’ fighter tayimtsütem kahzüka yok.
Ano 22nd Squadron-ia kasa rara nung khen apusoba nung Pakistan nunger raraba tayimtsü asem kahzük.
Hasimara Indian Air Force base ya India aser Bhutan arrtsü nungi kilometer 20 shi pilar lir aser West Bengal yimtiba, Kolkata nungi kilometer 680 shi pilar lir.