Yimsüsür ka tepsettsü tasa atongbaji Nagaland nungi masü

Dimapur, May 22 (Agencies): Nagaland nung yimsüsür ka tepsettsü tasa atong ta asüba onük nung tenük yokba yimsüsürji Nagaland nungi masü ta BJP MLA Mhonlumo Kikon-i ashi.
“Nagaland nung police ketdangser kati osang ashiba agi iba tasa atongba nung Nagaland sendaktepa mali ta ashir. Iba onük bushisüngdangba nung tanga osang ang ka bushitet ama lir” ta Kikon-i Twitter nung metetdaktsü
Nagaland police nungi Inspector General of Police (IGP) kati anir police telok ka Deobarnü New Delhi-i apusoa ogo. Parnoki Delhi police den külemi yaritepa iba onük atema asüngdangyatsü aser bushisüngdangtsü.
May 17 nü Delhi police-i Lucknow nung Vijay Farmana apuba ajanga Nagaland nung yimsüsür ka tepsettsü tasa atongba osang temai adok.
Police-ia Farmana den yariteper Sharad Pandey aser Kapil Chintania na apu.
Lok Sabha elections sülen Nagaland politician ka tepsettsü atema parnok nem sen lakh 80 aser Ford Endeavour gari ka agütsü ta osang ajanga ashir.
Ajisüaka, Nagaland Director General of Police T.J. Longkumer-ibo Delhi nung oa aliba state police telok nungi osang kecha mangazük ta ashir.
DGP-i Delhi nung oa aliba IGP nungi official report angutsü atar ta osang ka ajanga ashi.
Asüngdangba asüdang ashiba nung ajemdaker bushisüngdang asütsü aser tangbo iba onük atema jembitsü karara lir, ta paisa ashi.
Tang iba onük bushisüngdang tesüdak lir anungji iba dak osang yimjak nung metetdaktsüba ajanga timtem ajuru akok ta Nagaland DGP-isa metetdaktsü.
Naga Hoho, Nagaland Tribes Council, Naga Students’ Federation aser NPCC dena telok aikati Nagaland nung yimsüsür ka tepsettsü tasa atongba aitsüogo aser parnokisa iba tasa atongertem maitsü jangjatsü atema bushisüngdangtsü takhangba agütsüogo.
Hombarnü Nagaland deputy chief minister aser BLP leader Y. Patton-i anir BJP MLA temi New Delhi nung Union minister of state for home Kiren Rijiju den ajurutepa iba onük lemsatepogo.