Yimsüsür Mongin Dr. S.C Jamir

  ~ S. T. Yapang. Lkr. Kohima.

Yimsüsür mongin aser Nagaland mesümer rongnung tongti shilem agir Wb. Senayangba aser Wt. Takatula na chir Dr. S.C Jamir ya Ungma yimtiba nung küm 1931, October ita 17 anogo nung aso. Pa lanuwa yimdak zünger küm 1952 nung Govt. High School Mokokchung (Tangbo Mayangnokcha Higher Secondary School ta ajar) nungi class ter second division nung takok angu, idangji pa roll no 33 liasü.
Dr. S.C Jamir ya India nunger mezüng Prime Minister Pandit Jawaharlal Nehru-i kanga sakloka meimba nübu ka liasü, ibayongji Jamirba küm 30 shi asüdang nungi yimsüsübaren nung tongti maparen aika inyaka arudaki.
Pa Allahabad University nungi B.A., LL.B renemer Naga yimdenren nung tetsüng ajemoka Naga Peoples Convention(NPC) nung Joint Secretary aküm. Item kümtem nung Naga nüjiso bushiba tiyalong asünungji asen lima reshikangshi aser tebang agi meshitetba tammang tia nung liasü. Iba azütokshi maparen anena yimchiyimjung bener arutsü asoshi Nagaland Baptist Church Council aser NPC tanishirtem tsüngda jembitepa meranga inyak aser Naga Peoples Convention asemben buba mungdang 1959 küm, October 22 nungi 26 tashi Mokokchung nung akadang Naga nunger otsütsü onük tertrok (sixteen point Agreement) lemteta India den keno jembitsü tenzük.
Iba otsütsü onük tertrok nung meyongnem agütsürtemji; Asür Dr. Imkongliba Ao, President, NPC, Asür Vizol, Vice President, NPC, Asür Jasokie Secretary NPC aser Chubatoshi (S. C Jamir), Joint Secretary NPC ta liasü. Iba otsüsütsü onük tertrokji July 26, küm 1960 nung kin shia nungi item teshimtet nübu yaki pei kin tenüng nung India Prime minister tsüngdang bener oa agütsüa jembitep; Dr. Imkongliba Ao, Jasokie Angami, Chubatoshi (S. C Jamir), R. C. Chiten Jamir (Ao), Kheloshe Sema (Sema), Etsormo Lotha (Lotha), Sensi Rengma (Rengma), Lakhimong Yimchunger (Yimchunger), Pauling Phom (Phom) Litingse Sangtem (Sangtem), Pudene Demo (Chakesang), Imtichuba Chang (Chang), Thanwang Konyak (Konyak), Thinuowholie Zeliang (Zeliang-Kuki), T. N. Angami (Angami), Sashimeren Aier consultant, H. Zopianga consultant, Goyiepra consultant, P. Shilu Ao consultant.
Iba otsütsütsü onük tertrok India den NPC tanishirtemi kanga nenshia jembitepba rongnung tongtibangtem kar; Tasenba state dangji Nagaland ta ajatsü, India sorkar-ibo tenüng tanga ka agidaktsünü, Naga Pradesh ta amala. Nagaland-ji Home ministry kübok masü bendanger (foreign) ama Ministry of External Affairs ajanga reprangtsü. India parliament nung kechi ozüngsa latetdir latetaka Nagaland Assembly nung Tatar timbai mulunga magizük tashi aji Nagalima nung mebenshitsü (Saka ya Sobaliba dak sentakba keno nung dang temeten agütsü). Ali rongsen madak kibur asütsü. Ano Naga nunger aliba li ajak state ka kübok külemi alitsü asoshi kangasa nenshia ashi, idangji India tsütsü nungi Linük temzüng 3 aser 4 nung state ka ulushitsüji temeten agütsüa lir asünungji itemji tesülen reprangshitsü ta ashi, saka tanü tashi aji mapa makümer, item khulitem bener küm 1963 December ka nü asen Nagalima ya India nung state 16 buba süa Assam nungi pakzük.
Dr. S.C Jamir ya Jongshinokdanger poner lir (Jongshinokdang dak nungi jakzükba pezübuba), Jongshinokdang ya Ungma Riongsanger Pusu nung tazüngpur liasü, shibai Dr. E. W. Clark Khrista osang tajung sangdongtsü asoshi Ungma süngkhüm lapoktsüa par kidang aniok, pai Khristan yimsüji magizükaka Khrista osang tajung sangdongtsü pai Ungma lima nung lenmang sadema lapoktsü.
Dr. S.C Jamir ya India nung yimsüsür takutet ka lir, pai India linük aser Nagalima nung ketdangsüba maparen tongti aika nung shilem agia arudaki. Pa ya asen Nagalima nungi mezüngbuba Loksabha MP lir, ibaji küm 1961 nungi 1970 tashi inyak, item kümtem nungji pai item ketdangsübaren balala nung Kilonser mapa inyak; Parliamentary Secretary to Minister of External Affairs, Union Deputy Minister of Railways, Union Deputy Minister of Labour & Rehabilitation, Union Deputy Minister of Community Development & Co-Operation, Food & Agriculture. Tanü tashi India Union nung asen Naga nunger rongnungibo pai dang Kilonser mapa inyakdanga lir.
Tekalen ashiba ketdangsüba maparentem inyaker külen asen state nung tenzüktsü nükjidong nung pai 1971 küm tanabuba Nagaland Legislative Assembly election nung Mongoya A/C nungi toktepa takok angu, iba sülen 1974 küm asembuba Nagaland Legislative Assembly election nung Aonglenden A/C nungi toktepa takok angu aser iba kümsük nungji Finance, Revenue & Border Affairs kilonser mapa inyak. Iba sülen 1977 küm pezübuba Nagaland Legislative Assembly election nunga kasa Aonglenden A/C nungisa toktepa takok ngur Nagalima nung mezüngbuba Deputy CM aküm, ibaji April, 1980 nungi kasa küm June tashi inyaker yimten nung temelenshi adoka opposition tanishir inyak, ibaji küm 1980 nungi 1982 tashi liasü.
Kodang Nagaland Legislative Assembly election punguben buba agitsü mapang atong, idangji Congress (I) Naga lima nung amenoka kasa Aonglenden A/C nungisa toktepa takok angu aser November 17, 1982 küm CM shim, ibaji October 1986 tashi inyaker 1987 küm Raja Sabha nung mapang tatsüka asoshi MP inyaktsü ao. Iba sülen 1989 tenetbuba Nagaland Legislative Assembly election nung Mokokchung Town A/C nungi toktepa takok ngur CM aküm, aser kasa iba A/C nungisa 1993 küm tibuba Nagaland Legislative Assembly election nunga takok ngua CM-sa inyak. Tukobuba Nagaland Legislative Assembly election nungbo Aonglenden A/C nungi toktepa 2003 küm February tashi CM inyak.
Yimtenren nungji teti kasa malir, kenü tenembang, kenü pokpobang ta jembiba ama ajurur asünungji, kodang terbuba Nagaland Legislative Assembly election küm 2003 nung agi, idangji opposition nung alitsüsa tensa agi ajuru, iba mapang yaa Aonglenden A/C nungisa takok anguba liasü. Iba opposition menden nung lia küm 2004 nung Goa Governor asütsü shim. Pa Naga yimtenren nung tetsüng ajemoker election ti ben tashi nung takok ngua arudang UDF (United Democratic Front, ibaji tangbo NPF ta melenogo) ticket nungi anaben, aser trok ben Indian National Congress nungi ta adoka liasü.
Dr. S. C Jamir ya Goa Governor July 17, 2004 nungi July 21, 2008 tashi inyak, Gujarat Governor July 24, 2009 nungi November 26, 2009 küm tashi inyak, Maharastra Governor July 19, 2008 küm nungi January 21, 2010 tashi inyak. Iba sülen ano asentenshia Odisha Governor inyaktsü asoshi March 9, 2013 küm shimba tanü tashi inyakdagi.
Dr. S. C Jamir nem nüngtugu sempet item ya agütsüa lir; Lok Shree Award, Hind Rattan Award, Rajiv Gandhi Memorial Award, Indira Smriti Puraskar Award, Rajiv Gandhi Excellence Award, Arch of Asia Award, National Citizen Award, Rastriya Ekta Puraskar Award. Pa ya kaketkeno nunga mongin asünungji pai ‘Reminiscences of correspondence with A. Z. Phizo’ aser ‘Nagaland; Star of the East- A framework for transforming Nagaland’ kaket zülua lir. Asen lenniri tatishitsü tulu süa inyakteta toktsüba tsüngsü nung lanurtemi meranga anidakdi, aser pa tsüngnep teti mesamadaktsüi wazüka yutsüdi, kechiyong ya asen milendong.

(Source – Advocate N. M Jamir).