Yimsüsür timi shimba tajangzük

Tanüa asenoki taruba küm pongo asoshi yimsüsür ka shimtsü. Paji oagi Delhi nung lia asenok tenüng nung jembia asenok asoshi nüngdak inyaktsütsü. Atangji, election-i aibaji pei asoshi inyaktsüba masü saka nübortem asoshi inyaktsütsü air, anungji shiba adokdir adokaka tadoknü nungi amen nokdak maka nübortem asoshi inyaktsütsü imlar. Ajisüaka, election nung nübortemi vote ayokba ajanga tadoksangji dena sentsü aika tsülokerang yimsü asü tenzük nungbo, nübortem ajangzükdaktsütsü bilema masü saka pa tama ajangzüktsü asoshiang bilema mapa tenzüktsü. Tangbo parliamentary election dang asünungji, assembly election nung meshiba amabo nübortemia memeshii alitsü südi aser akok tashi pei vote peisasa enokba dak alaka tangar tenüng amerbo meinoktsütsü imlar. Joko, tang nungibo nübortemia election anogo nung vote enoktsür yutsübaji dang masü saka shiba adokdir adokaka, paji nübortem ajak asoshi yimsüsür asünungji, nübortemi paji tatar senden nung adener asü madener , tatar senden nung o jembir asü mejembir aser pa ajanga state nung terenlok mapatem kechisa inyaker ta pa danga asüngdangtsüa akok mesüra RTI ajanga metettsü akok. Kodang, nübortemi iba amaji wainshin meteta asüngdang boludir, yimsüsür aser inyakertema tali kümdangshidaktsür. Aji oda, tanü parliamentary election agiba nungi tenzüker taruba state general election tashi asenok ajak yimten nung timi shilem agir kaka asütsü merangtsübaji kanga nüngdak kümogo. Tia majung kaji, asenoki candidate tajung bushia sentsü metsüdaktsüi election nung adokdaktsüba ajanga tajangzük angutsübatem asenok nükla nung mangur aser merajemer. Iba jagi election magidangsa tajangzük tera ngura ojang ta asüba tangatetba nung asenok ariteper. Ashi, asenoki election temer külen asen lima tajungba küma asen nüngdak ajak angutsüsa election nung shilem junga agitet asübo, election nung tajangzük tilaka anguba dang nungi meyirijangben agia talila tajangzük angutsüsa inyaktettsüba lenmang lir. Tatishitsü agi, election mapang candidate ka dang nungi sen meyirijang ter meshizüka agir vote enoktsü. Iba amaji nisung aikati meshi nungji candidate-bato adok saka pai nübortem asoshi terenlok mapa kecha meinyaktet. Iba amaji lia, nisungba to ajungbena shirang saka anameta government mozü ki tajung malinungji among adena talangkati taneptsü bushia ao. Idangjibo sen lakh dak tema sentsü tsülok. Ashi, election nung candidate dang sen memeshii adoktsü asübo, par minister aser MLA-bai parnok alidak angati taneptsü angutsüsa government mozü ki tajung yanglutsür lila aser sentsü paikaji tsüloka shiranger among adena bener shisabolua mejajala. Election nung vote mayok asübo, gari lenmang tajung asütsüji, asenok gari yanglushiba nung sen paikaya meindokla aser gari nung senzüba jenjanga dalangba süla. Election nung sen agi masü saka tangatetba agi nisung shitak ka shimtettet asübo tanurtem school azüngba nung sen paikaya meindoki government school tajung nung züngla. Election nung sentsü matsü asübo, asenok tesangwa atema generator aser invertor nung sen meindoktsüsa government-i electric light ya kena maseptsüsa jungjunga arudaktsütetla. Item amaji asenoki asen ajangzüktsü amato bilema election mapang vote yoka achiba to, election temer külenbo, election nung meshiba sen dang nungi akanga agia teimba endoker külenang timatemtsüsa akümer. Election agiba ya tapi agir masü saka nübortem nem pei aginüba nübo shimteta yimsü südaktsütsü asoshi agir. Election sentong ya temenen sentong masü aser election-i aiba aser election nung shilem agiba ya tai masü, anungji asenoki asen asoshi tajangzük tilaka angutsü mechi election sentong tajung ya memenendaktsütsüla. Tanü asenoki election nung sen terakayong asen temeten ayokba ajanga asen dang masü asen chirnurtem tashi tangar lar ama alitsüsa asenoki atongtsür asütsü. Ibaji mamangra, election nung teti pei vote ayoker taküm, par kibong aser par chinurtem taküm jenjang reprangdangangma.