Yimsusurtemi nuburtem asoshi bendanga aguja tenzuktsula : S.Chuba Lkr.

Longmisa, January 20 (TYO) : Yimsüsürtemji nübur tejakleni anitsü asoshi tejangraba tulu akar asütsüla aser nübur asoshi mapang, rongsen kechisarena ajak bendanga agüja tenzüker asütsüla ta tanü Parliamentary Secretary & Animal Husbandary Parliamentary Secretary, S.Chuba Longkumeri Longmisa yimtak Putu Yimsüsür tasentem den jembidang ashi.
Tang ya Longmisa yimtak Mupongsang Putu Yimsüsüba mapang lir aser parnok 2015 küm October 16 anogo yimsüsür melenteper yimsüsür tasentemi mapa benzüka yimsüsüa aoba mapang nung lenir S.Chuba Lkr-i parnok yimsüsürtem ajurua parnok ajungshitepba senden ka menogo.
Alima nung temelenshi bener arutsü asoshi yimtsüngtemi mapa tulu inyaktettsü, anungji yimtsüng nung yimsüsürtemi temelenshi bener arutsü asoshi nentaka inyaktsüla ta tanü S. Chuba-i yimsüsürtem ayongzüka jembi.
Parliamentary Secretary-isa tang tendak Naga lima nung telongjem kanga nüngdakba mapang ka lir, anungji yimtsüng nung yimsüsürtemi Naga lima nung yimjung akatsü asoshi nüburtem rongnung iba mapa ya inyaktsüla aser sangdongtsüla ta ashi.
Naga nunger dak yimya aser tangatetba nung temelenshi nüngdakbaji sorkar dak nendaker aliba ya lir, saka iba jagi aiben takoksa dang ajurutsü, anungji iba tangatetba ya melenshitsüla, tanga lima nungbo nija tashi ita aliba ajanga nija dak-ang sorkar nendaker saka asenok yamaji masü, anungji asenok Naga nunger meranga inyaktsüla ta S.Chuba-isa ajungshia ashi.
Paliamentary Secretary-isa alima nung liba liyongtsu asoshi rongsenji kanga dang tongtipang, anungji rongsen akatsü asoshi asenoki shishilembaba nung temulung agütsütsüla ta ashi.
Paisa asenok nisungi shishilembaba nung noklang nung noklang bushir saka shitakbo asenoki noklang nung tajangzük tershilem dang bushitsuüla ta ajungshia ashi.