Yimsüsütsü arishi küm

Asenok Aor putu menden nung tatartem asoshi yimsüsütsü kümsük küm lateta yutsübaji küm semer lir, anungji küm semerji putu ka ta asenoki jembir. Hau, Ao yimtsüngsa süaka yim kar nungbo putu yimsüsüba menden nung küm semer tashibo memendaktsür. Küm kwi yimsü sütsü latetdir latetang, asenok yimten yimsüsübaren nung küm tatazük ka lateta yutsür aser aji serbo joko pujen (retiree) akümer. Aji oda, Aor putu menden nung yimsüsütsü atema nisung ka tatar akümdang, arishi küm 30 asütsüa akok, anungji iba nisungji arishi küm 60 asüdang putu menden nung küm 30 yimsü sür anenadoker. Asen tetsü tebui yimsü asütsü atema yimsüsürtem asoshi kümsük küm lateta yutsüba ya kanga junga shisadanger lateta yutsüogo ta bilemer. Ibai tanü asüng government tenzükertem asoshi mapai aitsü aser mapa nungi anentsü atema kümsük küm lateta yutsüba amai lir. Tang Nagaland government mapai aitsüba atema arishi küm teimtiba agi 35 asütsüla aser kodang arishi küm 60 jungdir mesüra mapa nung küm semer junga inyakdir, ana rongnungji koba küm agi tama tongdir idangji anener. Atangji, asen tsüraburtemi temang merükmejutsüa memetetba mapang, arishi küm 60 tashi alibaji kanga tantsür-tambur küma ali ama kokroka kümer kanga timtemasa ali. Iba denji tanü tensa alirtem taküm medemdangra, tanübo arishi küm 60 nung mapa nung anenertemji aiür asangurtem ama dang alur. Anungji, government mapa nungi anener külenang nisung aikati yimten, lokti aser arogo mapa nung tashi itta inyaker. Ajisüaka, government mapa yabo ajaki bushir, iba jagi lanurtem rongnung zünger mapa manguba tebilemtsü ya tuluba tuluba akümer, anungji government mapa nung inyakertem arishi küm 60 nung anendaktsübaji tim danga ta bilemer. Iba amaji yimten nung yimsüsürtem  asoshi yimten mapa nung amuoktsüba arishi küm 25 agüja aliba ya dang masü saka yimsüsüba menden nungi anentsüba arishi küm dena lateta ayutsü kanga nüngdaka kümogo. Tanü putu nisung ka taküm nung yimten aser lokti nung yakyak ta telemtetba agiteta, idangjisa mapa küm inyaka otettsüba mapangji arishi küm 35 nungi 70 tashi asütsü. Atangji, arishi küm 25 jungra yimten nung shilem agitsü melar, saka küm 25 jia ano memeshi aser ano nisung aikati küm 70 tema arishi küm tir aser tukur tashi tenük telen shitak aser temulung züngzünger tashi itta alir. Ashiko, itemji alima nung Tsüngremi mulungba ama alitsü merangertem südi. Ajisüaka, kodang nisung ka küm 60 jungdir, ma ta shi azü ajemer aser azümasen aiter, anungji temulung nung bilemaka jet ta telemtetba magitetter aser taoa moutetter. Ajisüaka, ano yimten aser lokti nung telemtetba shitak agia anitsübaji nisung tain nüngdaker, anungji government mapa nung alirtem arishi küm 60 nung anendakjaka, yimten yimsüsürtem asoshibo teimtiba agi küm 70 asü nung jungdisü ta bilemba ka taoba hopta nung asenoki yangi lemsatepogo. Atangji, yimten yimsüsübaren nunga, government mapa bushirtem amaji lanurtem aikati shilem aginür. Item lanurtem ajak dakji pei lima yangernüba aser pei nübortem tia ajungkettsünüba tangatetba aser tejangraba tulu lir. Parnokji ano alima rongsen agi temulung memenen aser tangar majung jembitsübaji parnok dak mali. Ibayongji, tashitemetetter lima US aser UK ama nung president aser prime minister-temji arishi küm lir mesüra tenem asüdang akümertem asütsü. India lima nung balaka yimten lenirtem ya tebok chizüker tambur tantsürtem tesa, ajungben alima lendong ka atalok nungbo mejenbutet taküm samatsü purtem lir. Item tambur aser tantsürtemi  India renloktsü asoshi mangdang tasen benoka jembir masü saka kati ka aitsütepa aser tangar nem sempadaktsütsü asoshi akhi tejen otsü kakteta tiyazü yanglushir jembiba nung mapang talangba endokba angur. Asen lima nung shisa tasen pokteta nükla tasen nung renloka odi süra, lanurtemi metsübui yimteni aittsüla. Asenoki lanur putu ta jembir saka yimsübo tamburtemi dang yimsü asür ta süra lanur putuji kodanga marutsü aser lanur putu maru tashi asen limai tangar memeneptsü.