Yimtak Co-ordinator aser Volunteer tem atema Orientation sentong ka katsüdar

October 27, 2016 nü SIRD conference hall, Kohima nung Mission Director, SRCW, Daisy Mezhur-i Orientation sentong nung jembiba noksa nung angur. 

Dimapur, October 27 (TYO): PSK/VCFS-i Poorna Shakti Kendra (PSK)/Village Convergence & Facilitation Service (VCFS) nung Co-ordinator aser Volunteer tem atema anogo ananü orientation sentong ka ayonga October 27, 2016 nü nung tenzüka SIRD conference hall, Kohima nung katsüdar.
Iba sentong nung Mission Director, SRCW, Daisy Mezhur-i, Anganwadi & ASHA tem den amalitepa inyakba den külemi Village Council Chairman, VDB Secretary aser yimtsüng nung aliba tanga tongti tentettem den tesendaktep tajung ayutsüla, ta ashi.
Sentong nung arua adenertem dang lai, schemes aser inyakyim balala den külemi tetsür atema tajangzük lenmang balala arubatem yimtaklirtem nem metetdakjang, ta ashi.
Lokti nung tetsür shilem agitsü nüngdakba tsütsü jembidang lai, tetsürtem atema tajangzük lenmangtem, schemes aser sentong tem metetpelatsü aser tetsürtemi timtem ajangshiba lemsateptsü atema iba amala senden ya ita nung khenbosa akatsüla, ta ashi.
District balala nungi iba sentong nung adenertem dang pei telok peisasa nokdaktettsü mechi district nung Self Help Group (SHGs) tenzüktsüla, ta Mezhür-i ajungshi.
Research officer SRCW, Meneno R. Vamuzo-i, NSSWB/SRCW dak sendakba temetettsütem ashidang NSSWB ya tetsür aser tanurtem atema 1958 küm tenzük ta metetdaktsü.
Lai, NSSWB ya tetsür aser tanurtemi timtem ajangshibatem sorkar nem metetdaktsütsü atema tentetba lir, ta shisem.
Department balalai tetsürtem dang schemes aser sentong balala ajak mapang shitak nung metetdaktsütsüla aser kasaji nüburtem nema metetdaktsütsüla, ta lai ashi.
PSK/VCFS atema temetettsü kar ashidang, Block Program Coordinator, Rokosalie-i, yimtak lenirtem den amalitepa inyaktsü ajungshi.
Paisa, yimtaklir mazüng mashiba tetsürtem dang tetsür atema aruba schemes aser sentong balala kanga junga angateta metetdaktsütsüla, ta ashi.
Supervisor, WHL-181 Vekhwusalu Dawhuo-i, Kohima, Longleng & Phek nung PRA+ Roles indang tongutetbatem aser teinyaktsütem lemsatep.
Tanü iba sentong District Coordinator, Ajabu Tungoe lenisüba kübok agia liasü.