Yimtaki maotsüba osang

Election mapang Dimapur nung alir Aotsür Aortem dang pei tsürabur yimtaki maotsü asoshi Dimapur nung tenteta aliba Aor telongjem tentet asemi metetdaktsüba osangji mapang shitak ka nung telemtetba osang shitak ka metetdaktsüogo. Dimapur nung kiyong ajak nung Aotsür Aortem nütsüngsa teimba amai lir. Ajisüaka, electoral roll reprangdangra Aotsür Aoer nütsüng apibo constituency ajak nung  Aor voters ishishi dang angutsü. Ibaji asenoki temulung magütsüba ajanga lir. Atangji, Dimapur nung alir Aotsür Aortemi Dimapur electoral roll nung tenüng ayutsü memerangbaji Mokokchung district kübok pei pei yimtsüng aser town-tem electoral roll nung pei tenüng enokdakja aliba agi asütsüa akok mesüra lokti tentet aser political party nung Aor lenirtemi tangatetba tajung agüja majungshiba agi asütsüa akok. Aji oda, talibo sensosa Dimapur nung alir saka vote-bo pei tsüraburtem yimtak dang lir ta asüba nungji takoksa ana angur. Kaji, pei telidak lima Dimapur nung yimsüsür shimtsübo tangar nem nungloka toktsür, anungji asenok asoshi tangari shimer, anungji pei alidak yimten nung temeten tuluka mali akümer. Tanabuba nung, bendanglen alirtem aoba ajanga yimertem rongnung meputep tali adokdaktsür, senotsü endoker aser election temer külen yimtaklirtemi election agiba tajangzük magitetter. Atangji, alima meimchir yimya asünungji bendanglen alirtemi mounüyonga mesüra yimtak electoral nung meinoknüyonga yimtaklirtemi pei yimtsüng nung voter aika sünüba agi bendanglen alir ajak yimtak telidak nisung amai kümer electoral roll nung enoker. Ano, nütsüng yongsük züngdangba (census) mapanga pei yimtsüng nung nütsüng aika sayunüba agi yim aika nung bendanglen alirtem ajak yimtak alir ama tenüng züluokdaktsür. Ano, asenok ajak tai menaba mapa ka lir, ibaji assembly constituency delimitation mapang constituency majemdaktsütsü asoshi tangalen alir aser  malir ajak yimtak voter kümdaktsür. Item ajakji pei yimtsüng meimba ajanga tai süaka inyakogo. Ajisüaka, ochimashi mapa meinyakyonga ochi mapatem inyaka pei yimtsüng meimtsü aser yaritsü maparen aika lir. Aji oda, tanübo ochimashi mapa inyaknüyonga technology  maparentem tapu balala ajanga meinyaktettsüsa nokdangba putu ka nung alir asünungji, ochimeshinüyonga ochishia alitsüsa adoker. Tanü putu nung alirtem asoshi tia tajungtibaji aji asütsü. Aji oda, tanübo kong lidir liaka asen lima ta ser aliba putu asünungji, joko Mokokchung district kübok pei tsürabur yim nungi pilaa alibajia bendanglen masü saka pei lima aser pei yim kümer alitsüla. Tanü aliba  Ao lima Mokokchung district-bo atong saka tongtibang yimten telemtetba agitsü anogo aru shia Chungliyimti-isa ora koda asütsü. Iba amaji tanü asenok Mokokcung district nungi Dimapur lima atongbajia Ao lima tasen yateta kümyonga aoba den kasa lir ta bilema pei pei alidak election mapang vote shitak enoktsütsü ashi, shinga tangar nem mesüzükdakja mesenzütsüla. Aji oda, ano Dimapur nung akok tashi pei tangatetba yari shilem agitsü ashi, yimten nung telemtetba agitsü mapang arudang, Dimapur lima ya asenok asoshibo bendang lima ama toktsür mesenshitsüla. Yimten nung election ya senso ka asoshi tongtibangtiba lir, iba yagi nübortem asoshi inyaktsü sentong yanglua inyaktsü atema yuisüsürtem shimtsü. Asenokbo injang prangpong amshia tashiyim agi dang election agia arunungji asenoki vote ka jenjangji apua apua bilemer. Ajisüaka, asen vote agi alima tzü mopong anishitsü aser vote agidang alima melenshitsü. Aji oda, senso shiai pei meyong vote tejangja enoktsüba ajanga yimsüsür tajung shimtsü anungji government tajung asütsü. Item jenjangtemji angateta, Dimapur nung alir Aotsür Aortemi pei tenüng kanga nendaka  electoral roll nung züluoktsüla aser election mapang kechisüdir süaka Dimapur ya pei lima asünungji , pei lima toktsür maotsüla.