Kohima, Feb 2 (TYO) : Mahatma Gandhi National Rural Employment Guarantee Act (MGNREGA) sentong ajanga yimtaklirtem küm nung anogo kwi mapa inyaktsüsa sen angutsü, item mapa aser senotsü taa angutsüba indangji yimtaklirtem nem jungjunga angatetdaktsütsüla ta tanü yangi MGNREGA sentong tenzüker küm ter ajungba sentong nung jembidang Nagaland Pradesh Congress Committee nung tir Wb. K Therie-i metetdaktsü.
Tanü Mongolbar nü yangi Congress Bhavan, Kohima nung Nagaland Pradesh Congress Committee aser Kohima District Congress Committee na longjemer MGNREGA tenzüker küm 10 ajungba sentong ya ayongzüka liasü. Iba sentong nung jembidang, K.Therie-i Congress nung inyakertem dang yimtak yimtsüng nung Job Card akartem asoshi inyaktsü aser parnokji küm nung anogo 100 ayangtsüsa mapa angur asü mangur, itemji jungjunga reprangshia inyaktsütsüla ta metetdaktsü.
Taküm küm Republic Day nung Nagaland angh-i jembidang, center sorkar kübok taküm küm job card ajak agi lakh 4.15 agütsüogo ta metetdaktsü, ajisüaka senbo crore 70 dang agizük, ibajibo anogo asem-pezüka indang nübo dang asütsü ta Congress leniri metetdaktsü.
Therie-isa Nagaland nung district ajak nung MGNREGA sen mashie amshiba atema aitsü. ” MGNREGA sen 50% bo MLA-temi parnok amshinütsü amshitsü asoshi ‘convergence fund’ tenüng nung ayur, ibaji inyakyim nung tai lir,” ta paisa metetdaktsü.
“Asenoki iba amaji meinyakdaktsütsü asoshi pei pei DC nem tezüluba nung agütsütsüla,” ta District terkaprongla nungi Congress Committees lenirtem adenshia alidak NPCC tirisa metetdaktsü.
Paisa state sorkari Village Council Chairman (VCC) aser Village Development Board (VDB) Secretaries nem blank cheques nung sign südaktsür sen agizüka agiba mapatem aitsü.
Item ama meshitaki inyakba inyakyim anendaktsütsü asoshi yimtsüng shia nung Congress lenirtemi yimtaklirtem nem tangatetba agütsütsüla ta paisa metetdaktsü.
Congress lenirisa ashiba agi, tang tashi nung Nagaland nung Assembly Constitution Congress Committees (ACCCs) kobaisa NPCC kübok malir, parnokji anogo ter tashi nung NPCC küboki marura parnok dak alang inyaktsü asoshi All India Congress Committee nungi osang arua lir ta metetdaktsü.
Iba sentong nung Congress lenir K.L. Chishi-ia jembia liasü.
You must be logged in to post a comment Login