Yimten ken o bo mesüoker

India kilo kilonser (Home minister) Rajnath Singh jaoka yakanü Kisama nung Hornbill benjong lapoktsüba mapang pai Nagaland nung Hornbill benjong takok ngua amongba asoshi o tajung aika shiogo. India nung dang masü saka Nagaland nunga Naga kin aika aser kin shia sobaliba balala süaka ka küma longjema litetba takok aser tepelaji iba ama benjong külemi amongba ajanga sayur ta paisa shia liasü. Item o tajungji angashia asenoka pelar. Ajisüaka, tang New Delhi nung Naga yimten tebilemtsü latettsü atema ken o tejembidak mapang ka nung kilo kilonser Delhi nungi Kohima tashi anibelema arur yimten ken o kata mesüokba agi Naga nunger mulungjang nung terata tuluka enoktsüogo. Kisama nung benjong amonger asünungji pelateper saka Kisama adenerbo Nagaland ajaklen tebilemtsü agi sünga lir. Kisama nung dang ashi benjonga Nagaland tesem kecha nunga mamunger. Dimapur nungbo benjong amongtsü melen linük tenzükertem tenüng nung tashiyim agi saru saruba timtem metizüktet nübortem longkak aittsü telemtetba agir atatepdagi. Iba ama tensa tia ka nung Naga nunger ajaki anganübaji Naga yimten tebilemtsü ken o jembia aoba tia indang anganür. Atangji, Delhi nungi aruagi Kohima nung Naga yimten ken o shitak jembia odagi aser yakta telemtetba kati arutsü ta ashiyonga tangbo tamang makatsüsa kümogo, kechiyong tamalena ato kilonser (prime minister) aser linük nung tir tashi aruagi Naga nungertem dang Naga yimten tebilemtsü latettsü asoshi teimla agütsür aobaji tao akümer. Ajisüaka, Nagaland timtembaji yimten tebilemtsü melatettet linük tenzüker telokang teimba teimba akümba tebilemtsü nungi adoker asünungji Naga yimten tebilemtsü yabo ajaki tekaratiba nung latetdaktsüner. Iba taginüba aser teyongyabaji metetlasang, Rajnath Singh-i Naga yimten tebilemtsü tia indang ken o kabosa süokla. Atangji, pa Naga yimten tebilemtsü indang jembii aru masü saka benjong nung adeni aru, anungji benjong indang jembir aotsübajia tim dang asütsü. Ajisüaka, teratatsü kaji India kilo kilonseri Nagaland nung Naga nunger yimten tebilemtsü kecha mali, Nagaland anüdok aser anülulen aliba Naga kin ajak Kisama nung sendena pelatepa Hornbill benjongmong amonger aser India telongjem kübok Nagaland state akümba anogomonga junga mongogo, ta angatet nungbo Naga yimten tebilemtsü latettsü asoshi Kohima nung dang masü saka Delhi nunga süoki ia mebilemtsü. Iba amaji India nungi arur yimsüsürtemi bilemra, ano Naga yimten tebilemtsü latettsü atema ken o jembia alibaren ya khen tesüshii aotsü. Iba amaji mataloktsü asoshi Naga yimten tebilemtsü latettsüba indang ya Nagaland state government nung alirtemi dena center nung yimsüsürtem den kanga süoki ia jembitsüla. Aiben yimsüsürtemi lokti senden nungbo Naga yimten tebilemtsü latettsü indang kanga temulung agüja inyaker amai jembiba angashir, saka yimten tebilemtsü ya lokti nung jembia latettsüla tebilemtsü masü saka yimsüsür o yimsüsür na shisabolu lemsatepa jembiba nungi dang tagitsü adoktsü. Joko, asenok Delhi-i aoba ya sen meshii dangbo maotsüla saka Naga yimten khuret bener oagi lemsateptsüla. Meshimetsür kati pei aginütsü shima magitet ama, asenok oagi Delhi nung meshimetsür ama among tashi nungbo tangar temulung koka Naga yimten ken o mejembitettsü. Tang Rajnath Singh-i Kohima nung Naga yimten tebilemtsü ken o dak aketba kecha meshisembaji Naga nunger asoshibo tajung masü ta asenoki angatetdi. Joko, center nung lennirtemi Naga yimten tebilemtsü dak aketba ken o mejembiba tetezüji Naga yimten tebilemtsü ken o jembia jembia tejembitsü maka kümogo ta sayur asütsüa akok. Atangji, ken o jembitsü pur lennir ka khen, ka khen ta alima nungi pilaa aoba asenoki angur aser ano tanüngba lennirtema yakta omatsü. Parnok aoba den külemi Naga yimten temeten indang jembiba ken o ya a tembangra, Naga nunger asoshi alima tsüngdang maksü aser takoksa tulu asütsü.