Yimten kibok asenba

Yimten aser lokti nung tangar dak temulung malem parnok shirnok den kechisa jembir ta ladanga kibok asenba aser itdangiter yoka tendangba mapa inyakertemji tongmelang aser teindang nisung masütsü saka temulung nung tamajung bilemertem lir. Parnok jagi tangar külaoktsütsü, maksütsütsü aser yirutsütsü. Aji oda, tanü India nung yimten nung opposition nung alir yimsüsürtem dang masü saka lokti tenzüker aser osangbenertem dena parnok indang mobile phone nung jembibatem ajak menüngoka ayutsüsa Israel nungertemi yanglutetba  software ka tenüng agi Pegasus amshia kiboksenba mapaji, shitak asünungbo, teinyakertemi tangarbo pei mapa nung takok mengudaktsütsü aser merenlokdaktsütsü asoshi inyakba mapa tamajung ka asütsü. Tangari angashitsü aser menüngoka ayutsü tsübua  phone nung tangar den pei jembinütsü mejembitettsüsa alitsübaji yimten yimsüsür, lokti lenir, osangbenertem aser shishilembartem asoshi tepuokdak aliba jenjang den kasa asütsü. Kechi mapa nung shiba südirsüaka, mapa tamajung mesüaka, pei jembiba ajakbo tangari angashia mejembiner aser mangashidaktsüner.Ajisüaka, tang alima kintem balala nung nisung meyirijang tenem shi indang phone nung jembiba agizüktettsüsa inyakba Pegasus software maparen ajanga inyakba nung India nungia dena nisung noklang asem shi indang mobile phone dena alibaji asenok ajak asoshi taoksatsü osang ka lir.  Pegasus inyakyim inyaker telok tenüng dang ya NSO ta ajar. N tetezü Niv, S tetezü Shalev aser O tetezü Omri, itemji iba Pegasus maparen tenzüker nisung asem tenüng lir. Parnoki ashiba agi, iba itdangitba Spyware mapa  Pegasus ya alima nung kiralongrartem mittsü asoshi yanglutetba maparen ka lir, anungji iba maparen inyaktsüba yabo government nem dang ashi kija aser tanga telok nem magütsür aser shirnok nem agütsüdir Israel yimten temelaba nüngdaker. Tetezü, India nung nisung 300 tashi indang mobile phone nung jembiba menüngoka ayutsü asoshi inyakba mapaji, tangar masü saka India government dang asütsü ta temulung melemi bilemer. Iba jagi, tang tatar hoho senden (parliament) nung opposition purtemi government dang iba maparen indang tama jembimatsüla ta akangba asenoki angur. Ano, tamajungbaji India nung Pegasus itdangitatsüba maparen nung züngsema alir parnok noklang asempronglaji kiralongrartem rongnung züngoker, kechiyong Pegasus inyakyim yabo kiralongrartem jembishinü, inyaksangshi aser senzüsenpongbatem aputsü asoshi dang lir. Aji oda, linük nung government nung alirtemi opposition purtem phone nung tangar den jembiba ajak menüngoka anidak nung koda asütsü ? Kasaji linük nung tongtibang nisung, lokti lenirtem, osangbenertem aser shishilembartem meyong phone ajak menüngoka anidak nung koma asütsü ? Iba lima nungji sensosangertem koma alitsü ? Iba inyakyimji tangar ka aonung asen yipten tashi anidaka aitba amai lir ! Atangji, yimten nung yimsüsürtemi teti parnokisa yimsü sünüa bilemtsü, aji alima nung nisunger yimya. Ajisüaka, yimten nung asen anemer aser maginürtem akoktsü asoshi Pegasus amaji spyware amshia parnok kibok asen tenzükra aser parnok aolen aser parnok jembiba ajak pua anidakra, nübortem tali majung akümtsü. Aji oda, nübortemi mulungba nung yimten lateta yimsüsüba lima ka nung, senso ajak kecha terata aser tetsübu melii temulung nung bilemba jembitettsüsa aser lemsateptettsüsa yutsütsübaji government teinyaktsü mapatem rongnung tongtibang ka lir. Ajisüaka, meyiper government-iang senosanger tarakzü majung taolen ajak nung software amshia kibok asenra, iba government jagibo nübortem mulung anisüngzüka melidaktsütettsü. Iba Pegasus mapa ya linük nung senso ajak asoshi lendong mapa ka lir, tangbo nisung 300 rongnungji nü phone-bo malitsüa akok saka asüng na tongtibang nisung ka kümra, parenoki nü phone-jia Pegasus nem arishidaktsütsü. Iba yabo tatem tashi bushitsüla aser koba government lidir liang, shingaia pei senso tajung anema iba amai kiboksen mapa meinyaktsüla.