Yimten telemtetba asü, Election ?

Tanü putu nung Naga nungertemi ajuruba timtem aser shisabolu khuret rongnung kaji Naga yimten tebilemtsü tatem küma latettsüba ya asütsü. Iba tebilemtsü ya melatettet tashibo Naga lima shirang maneptsü, anungji maintsü aser merenloktsü. Aji oda, külen Naga yimten nüchiso telatetba ka bushir aser külen kecha tetsükdak makai India temzüng kübok election agir ta asüba ya asenok yimten nung nüktapangtaba mapa ka lir. Joko, Nagaland indaktsünüra asenok ojang nüktapangtatsüla. Tang yabo asenokia asenoksasa kong nokdaka aliar memeteti ka kümogo, kechiyong Naga nunger Indian election nung ir adokertemia kechisüdir süaka India temzüng anema kecha meinyaktsü ta Tsüngrem tenüng nung tenangzükba agir yimsü asür saka ano kasa nisungtemi Naga yimten jenjang balaka latettsü nüngdakba indang jembir aser ano linük tenzükertemia India election nung shilem agir. Kümsa küm taküm aika lalua Naga yimten tebilemtsü latettsü asoshi jembiaka melatettetbaji asenoki India yimten küboka shilem magi maremer aser Naga yimten nüchiso atema nokdakba jenjang nungia mainshir ta anaprongla nung kasa nisung nokdaka aliba agi India-i Naga nungertem aküm metsübur. Koba lima nung südir süang yimten yimsüsür aser nübortem dak aküm akettsüba ya kanga tongtibang lir. Tangari aküm akettsüsa alinung dang tangar jagi asen o nanga agizüktsü aser telemtetba shitak agitettsü. English nunger shin o ka nung, ” asenok ket nung amtsük ka lir aser ibaji chir külen ano machi ama kanür,” ta ashir. Ajisüaka, amtsükji chira makatsü, anungji achitsü asü mesüra mechii ayutsü ta asüba nung telemtetba tasak süaka agitettsüla. Aji oda, tang tashi nung asenoki amtsükji tachia achir aser teka nunga ayur ta benshia aruogo, ajisüaka yamaji talangka moutettsü. Asenok Nagaland state yasa agitsü asü mesüra ano tanga telatetba ka agitsü ta asüba nung nübortemia ola adoktsüla. India temzüng kübok Naga nunger tema aser telongpur ajak election nung shilem agir aser kasa Naga nungertemisa India sorkar den Naga yimten tebilemtsü tatem küma ken o lemteptsü nüngdak indang jembir. Iba jakla abenba agi, tang tashi ano Naga yimten tebilemtsü ya tatem küma mejembitetter aser ano shirnokiang tatem küma jembitettsü ta asüba nung shisa tajung ka marur. Naga nunger kangshiba tesemji ibaji lir. Atangji, 1997 küm Naga nunger mulungtet teloktemi anir Nagaland nung election magili saka Naga yimten tebilemtsü ya tama latetdi ta terenemba ka nung kanga merangdangogo. Ajisüaka, Congress teloki tashi mangaba ajanga iba mapaji takok mengutet. Iba jagiang iba küm Naga nunger lokti tentettemi ashi mangai electioni airtem Congress candidate-tem ajak Naga nunger anemer (anti Naga) naroküm agütsüogo. Ashi, iba küm Congress teloki tashi angaa election magii ataa lir, telok ajak külemi longjemer Naga yimten tebilemtsü akoktsü merang asübo kokteter lila taka bilemer. Ajisüaka, ano 1997 küm ‘anti Naga” naroküm angurtemiang anir 2003 kümbo NPF tenteter election nung takok tajung ngua shilem agir tang tashi government bener arudagi. Jembiba apibo tang yabo Naga yimten tebilemtsü ya takok ngua latetter alitsüla saka ibai jembiba ama mapa inyaka aotsübo temela masü. Kanga tebenja aser tasak. Ibayongji Naga yimten lenirtem tambur küma alima nungi ka khen, ka khen ta piladokaka melatetter. Joko, Naga nungertemi telemtetba tasak ka agitsü nüngdaker, ibaji election agitsü asü mesüra tamasa Naga yimten tebilemtsü tatem küma latettsü merangtsü ? Ashiko, tang ya NPF teloki dang mulung nungbo, Nagaland nung election khen magii ataa lir, tamasa Naga yimten tebilemtsü ya tatem küma latetdi ta renem nungbo tangar yimten telokia angatsü südi, kechiyong anganü manganü ta masü, tang tangbo NPF dak alaka Nagaland nung tanga yimten telokbo kanga tashimait kümogo. Tamalen Congress jenjang ajungba mapang Congress-i Naga yimten latettsü atema election magi maremtet  süra tang NPF jenjang ajungba mapang, Naga yimten tebilemtsü tatem küma latettsü mechi  NPF teloki khen election magi aremtettsü asü ?