Yimten yimsüsüba nung Congress-i arogo anioktsü meranger: BJP

Shillong, Tsüklai 10 (Agencies): Meghalaya nung Congress-i electoral politics nung arogo anioktsü meranger, ta BJP-i aitsü.
Meghalaya Assembly nung züngsem 60 atema election Tsüklai 27 nung agitsü.
Garo Hills nung tamangba yimsü dak sendakba sentong ka nung adentsü atema Reverend Paul Msiza arutsü liasü, saka pa indang visa magizükba ajanga Meghalaya nung aliba Congress-i electoral politics nung arogo anioktsü meranger, ta Bharatiya Janata Party-i Rogonü aitsü.
Baptist World Alliance lenir indang visa application ya Johannesburg, South Africa nung aliba Consulate General of India ajanga Rasemnü magizük, aser iba ajanga election agitsü aliba Meghalaya state nung Khristanpur jashi.
“Congress indang agenda kicha mali, saka yimtenren ajangzüktsü mechi parnoki arogo ya lenmang tai nung amshia yimten yimsüsüba nung anioktsü meranger,” ta Bharatiya Janata Party indang Spokesperson, Nalin Kohli-i Shillong nung osangbener dang ashi.
Garo Hills nung aliba Garo Baptist Convention ajanga Khristan yimsü arur sesqui-centenary ajungba benjongmung adentsü asoshi Paul Msiza nem temelaba magütsü aser iba ajanga sorkari Khristanpur aser tanga tamangba yimsü asoshi miimshia yangluba agenda tem sayur, ta Chief Minister Mukul Sangma-i shia liasü.
East Garo Hills kübok Rajasimla nung Garo Baptist Convention ya Khristan yimsü arur küm 150 ajungba benjong Tsüklai 8 nungi 11 tashi amunger.
Garo Hills nung aliba Rajasimla nung Baptist Church ya 1867 nung tetsüng ajemok. Saka India-i arutsü sentong alir indang visa agütsütsü mesüra magütsütsü telemtetba ya BJP-i magir, ta Kohli-i ashi.
“Linük shia nung sorkari lemteta aliba temzüng kübok visa ketdangsertemi anidaker. India nung visa indang temzüng ya Congress-i yanglu, kechiaser parnoki linük nung küm 55 yimsü asü aser item ozüngtem sülen kin mesüra tamangba yimsü melemsai anidaktsüla,” ta Kohli-i ashi.
Baptist World Alliance ya alima ajunga nung aliba Baptist arogo aser teloktem indang lir aser iba telok ya London nung 1905 küm tentet.
Meghalaya nung züngsem 60 indang Assembly election ya Tsüklai 27 nung agitsü aser Metsüremi 3 nung vote azüngtsü.