Yimtenren party tem RTI küboki maittettsü: Centre Sorkar

New Delhi, August 24 (Agencies): Tanü Hombar nü Centre-i Supreme Court dang, yimtenren party temji Right to Information Act (RTI) küboki maittettsü, kechiyong ibaji ajanga parnok telung inyakyim nung kongshitsü, ta shiogo.

Yimtenren party temji nüburtem tashi, ta züngshitsü benokba nungji lendong lir, kechiyong yimtenren nung tsükchitepertem tsüngda parnok tebilemba ataloktsü asoshi parnoki tim masüba nung amshitsü, ta sorkari ashi.

Supreme Court-i Centre sorkar dang, kechiba yimtenren party temji RTI küboki maitettsü (?) ta asüngdangba telangzübji tanü Centre-i agütsüogo.

Ano melungtet telok (NGO), Association for Democratic Reforms-i PIL ka ajanga RTI act kübok yimteren party tem indang telangzüba agütsütsüla ta benokba sülen kasa telangzübaji Supreme Court-i Centre dang meshiogo.

Temepishiba benoker asoshi jembitsür advocate, Prashant Bhushan-i, National party tem nem state-i senotsü agütsür, kechiyong parnok dang income tax returns memeshir, ta ashi.

Bhushan-i, parnoki fund aruba nungi shilem 35 agütsütsüla, parnok dang ibaji memeshir masü no (?) Ibaji ajanga parnok nem sorkari senotsü agütsür ta temaitsü sayur, anungji parnok RTI küboki aittsüla, ta ashi.