Yimti nung mitkartem

Dimapur nung Naga Council-i tentetba Public Action Committee purtemi mepu shia nung telongjem tentet mendenbuba aser Dimapur temeket nung aliba yimtsüng shia nungi putu menden nung mendenbubatem jaoka yimti mita anüktsü nüngdakba indang jembibaji kanga rongdak nüngdaka aliba mapa ka indang jembiogo. Atangji, tsükchir aser ashir auer ket nungi kiyong mesüra mepu aser yimtsüng kümzüka ayutsü asoshi talirtem rongnungi  mitkartem shima inyaktsü jembibaji, tanü mezüng jembir masü saka akhidang nungi jembia aru aser tesem aika nung takok ngua inyaker. Tanü asüng yimten nung sepaitem shima mitkar mapa meinyakdanga, asen sobaliba nungbo akhi dang nungi yimtak yimtsüg nung lanurtem rongnungi mitkar shima yim kümzüka aru. Lepteptsüngtep anener tsükchir mali nungji tetsübu melii aliba mapanga, ajungben alima lendong atalokdang aser yimtaklirtem timtem ajurudang osang agütsütepa yariteptsü asoshi anogo shia kar khen, kar khen ta melentepa tsütenmong monga aru aser tsütenmong amonger dangji tsütenmonger ta aja. Aji oda, tsütenmonger jagi yimer ajak mapai oseper, ki shia ayupoka tua kitsük kirong lendong ataloktsüsa mi ali mali repranga insepa toktsü aser ajungben lendong atalokra jet ta jatepjara mapa inyak. Iba jagi nübortem kanga mulung anisüngzük aser teyari tulu angu. Akhidang, tsütenmongertemi yim anükba aser lendongtsüdong mapang nübortem yaribaji tanü police-temi inyakba dang nungi kanga agia tajungba aser temulung telemtetba liasü. Yimti anüktsü aser nisung tamajungertem ket nungi nübortem kümzüktsü asoshi sepaitem liaka, parnok den yaritepa inyaktsü asoshi, asenoki akhidang yimtak yimtsüng nung inyakba amato, yimtak mesüra town nung mepu balala nung asenoki tsütenmonger shima yim nükdaktsüba mapa tenzükra, iba jagi kitsük kirong lendong nungi dang masü saka ashir auer ket nungia nübortem taküm aser rongsen kümzüktsü. Atangji, item mapa inyaktsübaji tanü putu nungbo policetem lir saka parnokia kiyong, mepu aser yimtsüng ajakbo mayimjemer. Ibaji dang masü saka nübortemi dena mitkar mapa nungji police-temji meyarira aiben parnoki sademsadema tasü itta meinyaktettsü. Shitakba nung police shimba ya yimsüsür aser tulurtem meiner senzütsüba masü saka nübortem anüktsü aser yaritsü asoshi lir. Iba tangatetba nung yimteni sepaitem ya nübortem anükba aser yariba mapa nung aküm keta yura, iba jagi sepaitemji dang masü saka asen lima aser loktiliba dena akümketdaktsütsü. Idangjibo, nübortem o sepaitem na longjemer pei lima tamajunger ket nungi kümzüka ayuba mapatem nung shilem tajungba agitettsü. Joko, asenokia sepaitem ya sepaitem mapa masüba nung ojang amshitsüla aser nübortem anükba mapa nung tashimait alutsüsa sepaitem ya nisung meiner senzüba mapa nung kangabo mamshitsüla. Aji oda, sepaitemia pei mapa aser libaliro ajanga pei lima aser nübortem tangar tsüngdang akümketa alitsüsa inyaktsüla. Sepaibo sepai saka süoshi mashi ka agir yi jemer senzüra, yimti süngküm nung mitkar saka mitkar sang jagiang süngküm nung taru taoer ajak dang sen meshia agira, iba jagi pei lima aser nübortem aküm samar ta bilemtsüla.  Tang yabo nübortemi policetemi inyakba mapa anema nokdaker aser ashir auer miter masü saka süngküm nung police-temi tim mesüi inyakba mapa miter amai kümogo. Ibaji asenok ajak asoshi tebilemdangtsü aser temelenshitsü mapa ka lir. Asenok shiba südir süaka, asen mapa nung nübortemi temulung lemtettsüla. Iba jagi asen lima meraketa yangertettsü. Tanübo asenoki mebilemdangi aliba agi, lanur taküm aika raksaogo aser parnokji lokti asoshi meinperongtsüang ka kümogo. Itemji anüktsü atema asenok rongnung mitkar shima asen yim aser mepu anüktsü indang jembir. Iba tiaji jepaka tenük nungi nüktsü malu ta asüba tia lir. Joko, lokti yarir asütsü melen lokti nükenbelemdaktsür kümadokaka, asenoki parnokji asen anasai marudaktsüi nokdangba, jendokba aser pua merenshiba agi masü saka temeim agi parnok takümji yimkongi shilem agia melenshitsütsü merangtsüla. Iba atemaji kiyong aser mepu ajak nung nübortemi shimba mitkartem nüngdaker.