Yimtsüngtem nung health service tajungba agütsütsüla: Tir Pranab

New Delhi, June 18 (Agencies): Deobarnü Tir, Pranab Mukherjee-i, nisung ajak nem anema alibaren service tajung agütsütsü nüngdak, iba den külemi yimtsüngtem nung doctor temi yimdaklirtem tenzüktettsüsa infrastructure tajung agütsütsüla, ta ashi.
New Delhi nung Shambhu Shetty Memorial Haji Abdullah Super Speciality Hospital amenoktsü atema lung azüngtsüba sentong nung jembidang Pranab-i, health service tajung angubaji joko takar ama aliba libaliro ka masü saka nüngdakba ka lir, ta ashi.
Pranab-i ashiba agi, International telatet nung nütsüng 1000 shia doctor kakabosa alitsüla, ajisüaka India nungbo nütsüng 1,700 shia doctor kaka dang lir.
“India yimtsüngtem kübok community health centre tem nung surgeons shilem 83.4 agi anünger, obstetricians aser gynaecologists shilem 76.3 agi anünger, paediatrics shilem 82.1 agi anünger aser general doctor shilem 83 agi anünger,” ta Mukherjee-i ashi.
“Iba ya ajanga, asenoki doctor shilem 50 agi ajemer tesayuba aser training agütsüba jangjar,” ta paisa metetdaktsü.
Pai ashiba agi, doctor tem agi anüngba atema tangsa rongdak süa inyaktsüla aser tashidaktem nokdangba nung rangloker inyaktsü nüngdak.
District aser yimtsüngtem nung infrastructure tajung agütsütsüla, koba ajanga item tesem nung inyaktsü asoshi doctor tem ajungmesotsü, ta paisa ashi.
“Tesüiba küm 70 nung asenoki healthcare tsütsü kanga terenlok nguogo,” ta paisa shisem.