Yimtsüngtem nung shisaliok nükmen tajungba küma yanglushitsü nüngdaker

Tuli, Jan.14 (TYO) : Kodangsa asenoki asenoksasa tamakok aser teküpbok jenjang nung aliba asadangtetdir, iba mapangji kümkümshitsüba mapang tajungtiba asütsü, anungji kümkümshitsü atema nai na yanglushitsü aser yangluloktsü mulungtettsüla ta Vigilance & Anti Corruption, Nagaland nung Director aser DIGP Wb.I.Meyionen Jamiri metetdaktsü.
Pai iba o ya Langpangkong Kaketshir Mungdang (LKM) 31 buba Lokti Senden sentong nung Bodbar aonung “Tekümküm Nukmen” a asüba onuk nung ajemdaker jembidang metetdaktsü. LKM lokti senden aser Saisapong sentong na reptepa Tuli nung January 12 nungi tenzüka mongdagi aser January 15 ao aonung tembangtsü.
Tanu putu nung maparen ajak tetenzükdak nukmenji shisaliok (education) lir, anungji asenok shisaliok nukmen mejungra tapu aika merangdangyonga takok mangutsü, nukmen nung aibelenbajibo nukmenji yanglushitsüla ta paisa ashi.
Tanu asen lima jungnuseta nukmen majungba agi renloka moutetba timtem ka reprangteta ashidang, Nagaland nung aser talisa Langpangkong nung Government school aser private school-tem na prongla toktepa majung, ibaji asenok ajak asoshi tebilemtsü tuluka lir, anungji “Research & Evaluation Committee” ka shima tashidak puteta mozü agütsütsü kanga rongdak nungdak kümogo ta Wb.Meyionenisa metetdaktsü.
” Takok angutsü asenoki kwiben jembidir jembiaka, kümkümshiba aser tazüng nungi nukmen amenshir apusoba mali tashi asenok kodanga tashi itta tejakleni tebilemba ama moutettsü,” ta paisa ashi.
Iba tekümküm nükmen amenshiba nung lokti tentettemi kanga süokia ia bilema shilem agitsüla aser school tesayur, VEC aser tsüraburtem ajaki pei khuret aser tata shilem meteta inyaktsüla ta school nükmen yanglushitsü nungdaker ta Meyionenisa metetdaktsü. ” Ibai tai tongloktsüteptsüba mapa ka masü saka arok tashi mait asadangba mapa ka ta angatettsüla,” ta paisa ashi.
Iba kasa sentong nung tayongzükba o Mokokchung DFO, Wb.T.N.Meren, IFS-i jembi aser tepela o Asetkong Kaketshir Telongjem Mongdang Tir, Wb. Sp.Rongsennukshi aser Changkikong Kaketshir Mongdang Tir, Wb.Supongyanger Tzüdir nati jembia liasü.
Kasa sentong nungsa ‘Cultural Quiz’ aliba nung mezüngbuba akok jenjang Akhoya, tanabuba jenjang Mongsenyimti aser tasembuba jenjang Asangma kaketshir telongtemi ngua liasü.
Iba sentong nung Akhoya Baptist Arogo nung Youth Director, Wb.Jongshimanen menden liasü aser tekülem tayongzükba mapang tatasüka Tuli Lenden Baptist Arogo nung sannuker, Wb.Imsutoshii agia liasü.
Iba sentep sentong nungsa Mungdang choiri Mungdang omen, ‘Tekümküm Nükmen’ ken tajung ka tena telok molung ayongzük.
Iba LKM lokti senden aser saisapong sentong ya Hokolbar aonung atemtsü aser iba sentong nung Parliamentary Secretary, Wb.S.Chuba Longkümer tetushi tejaoker asütsü.
LKM saisapong sentong nung ya yimtsüng shia nungi teburtem football aser volleyball aser tetsürtem volleyball asayadagi.