Yimtsüngtem tashi itdaktsütsüla: Modi

Mhow cantonment, April 14 (Agencies): Tanü Madhya Pradesh, Mhow cantonment jila nung ‘Gram Uday Se Bharat Uday Abhiyan’ sentong tenzüktsüdang Ato kilonser, Narendra Modi-i, linük terenlok atema yimtsüngtem nung rongsenkettsüng tashi itshidaktsütsüla, ta metetdaktsü.
Dr. B.R. Ambedkar ya Mhow cantonment jila kübok Kalipaltan tesem nung aso, aser pa asoba anogomung nung tanü Ato kilonser, Modi-i asür nem naro tokja akhüm agütsü.
‘Gram Uday se Bharat Uday Abhiyan’ sentong ya mangdang tulu alisang, Ambedkar ajanga ajungshiba lir, ta Modi-i ashi.
“Mahatma Gandhi mangdang, gram swaraj ano mataloker aser nüjiso anguba sülen küm 70 jungnüa tashi nunga temelenshiji madoker. Yimtsüngtem nung temelenshi atema onoki iba Abhiyan ya tenzüktsüogo,” ta paisa ashi.
Iba mapatong ajanga yimtsüngtem atema Centre-i benokba scheme balala nüburtemi metettsü.
“India’er terenlokji yimti 5 mesüra yimti 50 aser industrialist tem ajanga malitsü. Terenlok atema yimtsüngtem rongsenkettsüng tajemdakdak tashi itdaktsütsüla,” ta paisa shisem.
Tanü iba sentong nung Ato kilonser, Modi den Madhya Pradesh Chief Minister, Shivraj Singh Chouhan aser tongtibang nisungtema densema liasü.
Tanep Modi Indore airport tonga arudang CM, Chouhan aser state Health Minister, Narottam Mishra nati pa agizük.