Yimtsüngtem terenlok atema nendaka inyaktsüla: PM Modi

‘Panchayati Raj Day’ anogomung aser anogo 10 sentong ‘Gram Uday se Bharat Uday’  tembangba anogo nung Ato kilonser, Narendra Modi-i Annual Devolution Index, PESA aser e-Panchayati Awards agütsüba noksa nung angur. (Jamshedpur, April 24, 2016).

Jamshedpur, April 24 (Agencies): Yimtsüngtem nungi tenzüka democracy tashi aittsü atema tayongzükba agüja Deobarnü Ato kilonser, Narendra Modi-i gram panchayats dang, sorkar senotsü aser scheme balala anguba nung ajemdaker terenlok mapatem nung shilem tajung agitsüla, ta metetdaktsü.
‘Panchayat Day’ anogomung nung Ato kilonser Modi-i, linük terenlok alitsüji yimtsüngtem terenlok dak tulu ka keta lir aser iba atemaji yimtitem o yimtsüngtem na sentakteptsü nüngdaker, ta ashi.
Yimtsüngtem nung, talisa aluyimertem, tetsür aser  tanurtem terenlok atema inyaktsüla ta shia Modi-i, pa kümsük pongu inyakdang pai inyaktetbatem indang jembitsüsa pai senmang tajung toktsüner, ta ashi.
Tribal nüburtem jenti aliba state, Jharkhand nung anogo 10 nü sentong ‘Gram Uday Se Bharat Uday’ tatembangbuba anogo nung jembidang Modi-i, “Asenoki panchayats tashi itdaktsütsü nüngdaker. Gram Sabha ji Parliament ama tongtibang lir,” ta ashi.
“Asen nükjidongtem atongtsü atema asenoki longjemer inyaktsüla,” ta shia Modi-i, gram panchayats aser Centre sorkar  na amalitepa inyaktsü ajungshi.
Yimtsüngtem nung terenlok atema pai yim nung tokolaktem dang, infrastructure terenlok, metsü-meshitak, tanurtem anema alibaren aser shisaliok densema terenlok mapatem nung lenir asütsüla, ta ashi.
“Tamalenbo senotsü agi anünga liasü. Tangbo senotsü tangutsü aika lir. Senotsü agi anünga mali. Saka tekübokba  jenjang nung inyakertemi nendaka inyaktsü nüngdaker,” ta Ato kilonseri ashi.
“Saksalema liang. Tejaklen nungi aniang. Iba sülen ketdangsertemia parnok mapa inyaktsü,” ta pai yimtsüng nung tekolakpurtem dang ashi.
Panchayat nung tetsür züngsemtem dang Ato kilonser Narendra Modi-i, “Asen ojala nungertem aser aianutemi moapu nung scü kozüba ya anendaktsütsü atema inyaktsüla. Metsümeshitak yanglutsü atema inyakang. Nenoki iba atema tenangzükba ka agiang. Asen ojalatem aser aianutem moapu nung scü kozüba maksü daka alaka maksü tuluba mali,” ta ashi.
Lokti nung temelenshi  atema tetsürtemi yakbang ser inyaktsüla iba den külemi senotsü timi amshitsü atema tenük yoktsüla, ta paisa shisem.