Yimya awashi tajungji kanga tongtibang: Miathou Krose

Dimapur, Luchii/December 7 (TYO): Anogo ana asayatsü aliba Medziphema Town, Inter-ward Volleyball Tournament, tanü NHHDC Ltd, Nagaland mendenbuba Miathou Krose-i Thehouba Ground, Ward- 5 nung lapoktsüogo.
Asayamung lapokba sentong nung tetushi tesemdanger ka ama o jembidang Miathou-i, asayamung ayonger Medziphema Town Youth Organisation (MTYO) pur aser kiyong balala nungi team tem tenüng asang. Küm 10 tejakdang lanur lokti tentet nung lenir ka ama inyakdang ajangshiba tem lemsatepba mapang, pai iba amala sentong ayongzüktsü asoshi temela masü saka Medziphema jila nung aliba lanurtemi taa kecha magi jila kümzüka ayuba aser ozüng alema inyakba maparen balala nokdangba aser lokti ajungtsü asoshi sentong balala ayongzüka kaa arudar ta ashiba den lanurtem dang maneni iba amala mapa tajung angazüka benshiyonga aotsü ajungshi.
“Inyaksangshi ajak ajanga nisung ka yimyayimpong aser jakla liro sayur, anungji saisapong nung densema yimyayimpong tajung benshitsü ya kanga tongtibang,” ta pai ashi. Paisa, “asaya akoktsüji masü saka asayar yimya tajungtiba benshia shilem agitsüji tongtibangtiba,” ta ashi.
Asayartem ajak dang junga asayatsü asoshi ajungshiba den Krose-i ashiba agi, “takok angutsü aoshi asenoki yimya tajungtiba benshia teti temzüng ozüng sülen anidaktsüla.” Paisa, iba amala saisapong ajanga mangatettep aliba benteta nisung mesera lokti tsüngda tangatettep bener arutsür, ta ashi.
Asayamung lapokba sentong ya MTSU tir Kevisese Krose lenisüba kübok aka aser MTABC, pastor Anungba Imsong-i sarasadema tenzük. Sentong nung MTYO tir Asazo Talie-i lokti pelaa agizükba o jembi aser Letginlal Singson-i ken tajung ka aten. Iba asayamung atema senotsü teyari agütsür rongnung PS to Dy. Speaker, Zasivi Meyase, aser NDPP, Founding member, Megohulie Vüprü na densema lir, ta MTYO General Secretary, Mhasilevi Kuotsu-i sangdong ka ajanga metetdaktsü.