Yimya sübaba

–  Shri. T. Imo Jamir, Changtongya Yimtiba.

Alima nung alirtem dak aketba jakla asünung ajak dak yimyasübaba kar lir aser yimyasübaa ayunungji ibaji dang ashi memelenshili asür. Nisungi shitak masüa tabo metet aser itemi melenshitsüla tabo bilemer, ibai mapensa tabo apijemer, saka yimyasüba adok nung memelenshiteter. Shitak asü tai ajibo memetet, saka tanur asüdang yamai angashi, “English oshi nung master mali”, tebilem nung aji shitakang asütsü ama, kechiaser oshi kaji kasasa amai süaka asen aliba tzü-mopung aser chiyongtsü achi-ajemba dak keta alinung tesem balala shia ola-osü balala jembir aser pari ajiang jembir asünung shingaia yangji tai mapur. Oshi kaji nisung teimbai koba angatetepa jembir aji standard oshiji lir.
Asenoki tai ta metetsümonga aser temelenshitsüla ta apitetaka yimyasübadok nung memelenshi-i tanü tashi jembia amshiba olong aika kir. Item rongnung olong kar agiteta tai ama bilemba tuteta yangi agütsür. Item olongtem kar  ojang (spelling) kar melenshira shitakba meaningji adoktsüba lir aser olong karbo asenoki paitepa jembibatem lir. Itemla ya asenoki melenshidi süra tasak masü saka shia aruba ama yimya sübaba nem moksepdaktsür tanü tashi memelenshir.
1. MONOKNOK (EARTHQUAKE): Ibai ‘MONOKNOK’ ta masü saka ‘MANOKNOK’ ta jembi nungang shitakba tetezü jibo adoktet kechiaser shingaia manoker/manokshir saka pasasaa anoker/anokshir. Yangi ‘o’ ojangji ‘a’ ojang agi melen nung shitakbaji adoktsü. ‘Monoknok anoker’ ta asüa nungji kecha tetezü mali saka ‘Manoknok anoker’ ta süra shingaia manokaka/manokshiaka pasasa anokshir/anoker ta ashirba lir.
2. ANÜ-TETSÜ (WATCH): Sun-mother ta English nungbo shitet, ‘Anü-tetsü’ ta amshiba/jembiba nungji kecha tetezü mali sürnung tanü tashi ajioda asenoki amshir. Shitakba agi ‘Watch’ ya asenoki mapang tetzütsü/metettsü atema amshir, mapang metettsübaji ‘anü’ kong lir ta asüba nung meteter anungji ‘anü-tetsü’ (sun-mother) ta masü ‘anü-tetzü’ (sun-indicator) ta amshira iba jagi shitakba tetezü apensadaktsür. Yangia ‘s’ o-jangji ‘z’ ojang agi melen nung watch ji mapang tetzüba oset ta jangjar.
3. TSÜDENMONG/TSÜDENMONGER (MITKAR/WATCHMAN): Tsüdenmong amongba yimya ya asen Aor sobaliba nung inyakyim tajung rongnung ka lir. Ibai tanü talen tasenkeper kelen kidangmonger tetsür-tanurtem akümasünga reprangtsüba den yimdak ajungben lendong timtem atalokdang osang apentsübaji tsüdenmonger mapa lir. Tsüdenmong ya yimdak nisung kar shimteta küm piyong mongdaktsütsüba masü, saka yimdak talirtem kibong ajak ka kenü, ka kenü ta atonga-atonga dena-dena amonger. Tsüdenmong ya dena-dena ka kenü, ka kenü ta amonger sürnung asenoki ‘TSÜDENMONGER’ ta jembir aser iba olong jagibo kecha tetezü mapensatsür. Pa mapa aser inyakyim jagibo ‘TATENMONGER’ ta ajatsüba, kechiaser ibai dena-dena amongba mapa lir. Asenoki Tadenmong tajisa mejanera ‘TSÜDAMONG’ ta aja yonga shitak dang kechiaser iba pei tsüda (tangar tsüda masü) amongba lir. Shitakba tetezü lia jembitsüla ojang ana asem liaka meshidakba olong ka jiang asenoki sapua jembir saka yimyasüba adok nungji koda asütsü!!!
4. TZÜPO (WELLS): Ni apitetba agibo asenoki TZÜPO ta jembiba yagibo shitakba taginüba tetezübo madoktettsü südi, kechiaser tzüpo ta asüba ya tzü-ataba tesem ka lir. Ibai TZÜPO masü TZÜMO tzü-moshia alidak mesüra ‘TZÜPOK’ tzü-apokdak ta shinurba sür nung tejembitsü ola osü ajungba apia pelenzüka jembirang asütsü ta bilemer. ‘Tzüpo’ yaa kenyongi tetezü maliba olong ka yimyasüba adok nungji ‘shi den chiyonger ama’ jangratema jembir. Oda shitakba jembitsü olong maka masüji tetezü apensaa  aliba o kajiang jembitsü merangdi.
5. ANTSÜ (EGGS):  Nisung aikati an-i akoba ka indang jembir sür nung ‘ENTSÜ’ ta amshir, kechiba entsü ta amshir ta asüngdangtep nung aikati langzübaji ‘yimzüba’ shirurui akoba asüba agi ‘entsü’ ta amshir ta angazük.  Yimzübai akoba agi amshir süra kechiba ‘INTSÜ’ ta mamshi-i ‘ENTSÜ’ ta-ang tai tali bendenloksemer amshir!!! An-i akoba tashibo asenokbo ‘ANTSÜ’ ta amshidi kechiaser shitakba amshiba nungji shinga makoksar (ta shidanger). Ozüi akoba tashibo ‘antsü’ tabo mamshili süra ‘otsü’ ta amshitet. Saka kenyongi kecha nunga sentaka makaba olong ka osü topur junga adoktsü meji amshidi ta asübaji kenyongi menüngdaker. Oda olasü majungji mamshili ta asenoki meshitet kechiaser asen oshi agi ajidang “shi-i ango makümer, ango-ia shi makümer”
6. YI TZÜ/MEJEMTSÜ: Iba olong ana ya asenoki meyoktepa yur mependangteti jembirang asütsü südi ta bilemer, aji ya: Yi ajemtsü atema yi saa ayuba nungi aluba tzü dang asenoki ‘MEJEMTSÜ’ ta amshir ano kasajisa aon nung tasentsü atema amshitsü ayuba yitsük saa ayuba nungi aliba tzü danga asenoki ‘YITZÜ’  ta jembir/amshir. Tazüngertemia koda bilemer!!! Shitakba agi yi ajemtsü atema sa-a ayuba nungi aluba tzü dangji yi-tzü (yi nungi aluba tzü) ta ajatsü tim  aser kasaji aon nung tasentsü atema amshitsü yitsük-saa ayuba nungi aliba tzü dangji ‘MEJEMTZÜ’ ta ajatsüba jiang tim-a toh naa!!! (mejemtzü tetezü tasen, mejem tetezü tepo mejem)
Tang asenoki jembiba yabo yamai: –
a. Nashi-i tesü atsüba dang ak scü aser
b. Ak-i tesü atsüba dang nashi scü ta ajaba/jembiba amai lir. Nashi scü o Ak scü naji ‘yi-tzü o mejem-tzü’ amaji paitepa jembi/amshi nunga asenoki hai haura katima!!!
(Tazüngeri angatettsü atemaiba ocet nung English olonga karbo amshitsüsa akümer)