Yimya yimpong tamajung kar reprangtetba melenshitsü atema nüburtem den lemsateper.

– R.Imkong Lkr 4th Mile, Diphupar Dimapur

Asenok nüburtem rongnung yimya yimpong tamajung benshiba aser inyakbatem melenshidid asünungbo tapu aikasa lir, saka item rongnungji kangasa tongtipang tapu ana lir. Mezüngpubaji Election mapang nung yimtsüng “Candidate” shimba ya ka lir, aser tanapubaji nisung kati pei sasa pei-ji tang nisung chichiba, shidakba ta bilema inyakba aser jembiba ya lir.
Asen Naga lima nung yimya tamajung kaji pei pei yimtsüngi pei yimer atema candidate ka shimba ya lir. Iba yimya ya shidi asünungbo “undemocratic” lir, aser “democratically acceptable” tetezü nüburtemi mulungba nung inyakba, benshiba ta ashitsü akok. Saka kodang “undemocratic” ta shidir linük temzüng agi memelaba ta ashitsü akok, aser kodang linük temzüng agi memelaba maparen kar, kari inyakdir item dangji kin ka mashi leni anir aoba ta ashitsü akok.
Yamaji tan taoba 2018 general Election mapang nung tu shirnoki aser koba telokisa pei yimtsüng candidate shimer toktepogo, parnokibo ashitsü, ozü lima nung ozü yimeri mulungba candidate ka shimer MLA ka kümdaktsütsübaji onok dak temeten lir ta bilema alitsü akok. Saka yimtsüng ka nung kin kidong balalajibo doktsür tebou ka dak nungi jakzükba tanurtem rongnunga sang oda pei mulungba nung “candidate” ka ta masü saka “party” kaji pei mulungba shimtsübaji alima temzüng agi melaa lir. Anungji tarutsü mapangtem nungbo ibala tangatetba nungji ora asen kin nüburtem ya India ta masü saka tangar “western countries” tem menepa tejakleni aotsübaji asenok dak dang keta lir. Yamaji mesü-i kari pei kisüng tangatet nung nüburtem kangshia memelungi mesüra maginüseta, maa sümonga mashi lemangi anidir, iba nungjagi teraksa ang tali tuluba adokdaktsübaji kin ka masü lenmangi annir ta metettsüla. Aser shibaisa pei mulungba agi nüburtem antisü merangdir pa mesüra la jagi tarutsü mapangtem nung peisasa pei dak timtem tulu bendenloker ta metet alitsübaji kangasa tongtipang ta shia atar.
Tanapuba nung nisung kati pei sasa peiji dang nisung shidakba mesüra chichiba ama bilema inyaker aser tangar nisungtembo khen agi nisunga ta züngshia maliba, item amala nisung tangji “selfness, selfish” ta ajatsü tetemsü lir. Aser ano tanga olen ka nung “English oshi agi yamai ashitsü akok, “having no regard to others or having to do by oneself or himself, which means Dictator or absolute ruler of a province or a country.”
Asen lima lokdilaba tapu balala aikasa ali nung, item amala lokdi nungji pei-i bilembajiang shidakba ta bilemba nisung jagi alima nung teraksa tulu bener arutsür. Yamaji ni serbo tangar nisungtem shiba ali ta bilemba nisungtem kar lir, item jagi lokdiliba tilaba nungi shir tuluba tashi nung mangatetep bener arutsür aser item amala tangji “Hindi” oshi nung “jaawal mein gala dal hain” ta ajaba asenoki “cinema” reprangtang angazüka aruogo, aser iba tetezü-ji jang temesüng nung Dal tanakla aliba ta jembir. Saka iba tetezü-ji tangar dang nungi balaka tamajung jokteta adoka aliba dangji ashir, anungji asenoki yamala taküm ka alitsübaji memerangtsüla ta shisemer. Anungji senso tajung ajaki angateta alitsüba o kaji nai aser ni tangarji mera ketdakja hauni ta züngshia akhüm agüja benshira mesüra jembishinüra tangaria naji mesüra niji hauni ta züngshitsü ta ajaki angatet nungbo alimaji kodaser majungtsü aka? Ni bilem nung alimaji junger-a anüngtsü südi. Saka iba yimya yimpongtemji aikati junga mebenshiba ajanga lokdiliba ajak nung teraksa tulu adokdaktsür aser alima nung nisungtem tsüngda nung yimjung, tesünep malir ta angatettsübaji kangasa tongtipang ta rajemdaktsüner.
Kanga pelar.