Yipru agi Bangladesh kongshitsü; NE nung tzünglu sashia arutsü

New Delhi, November 03 (Agencies): Yipru mopung tesashi agi Bangladesh kongshitsü, aser ibaji ajanga taruba anogo ana-asem tsüngda northeast state tem den West Bengal, Odisha aser Andhra Pradesh nung tzünglu kanga sashia arutsüa akok, ta tanü Brihostibarnü weather office ajanga metetdaktsüogo.
Tang iba cyclone ji Visakhapatnam south-southeast nungi kilometer 530 pilar, Paradip south-southwest nungi kilometer 730 pilar aser Khepupara (Bangladesh) south-southwest nungi kilometer 1020 shi pilar lir.
“Taruba ghonda 24 nung iba yipruji northwest tsütsüleni aontsü aser ghonda 48 tsüngda northeast tsütsüleni meyipa Bangladesh tzüyimkümleni aontsü aser yipru mopungji kanga tesashi akumtsü,” ta India Meteorological Department, Cyclone Warning Division nung tongti, M Mohapatra-i metetdaktsü.
Taoba anogo 10 tsüngda iba ya Bay of Bengal nung yipru tanabuba asütsü. October ita tatembangbuba hopta nunga cyclone ‘Kyant’ kümteta liasü saka tzüyimküm nung mekongshi.
MET department-isa, November 4 nungi 6 nü tsüngda Odisha tzüyimkümlen aser West Bengal tzüyimkümlen tzünglu arutsü ta metetdaktsüogo.
Ano November 5 nü Manipur, Mizoram aser Tripura state tem nunga tzünglu sashia arutsüa akok.
November 4 nü Andhra Pradesh tzüyimkümlen tzüsem tulu alitsü, November 4-5 nung  Odisha tzüyimkümlen tzüsem tulu alitsü aser November 4-6 anogotem nung West Bengal tzüyimkümlen tzüsem tulu alitsü, ta department osang ajangasa metetdaktsü.
Iba dak sentakba nung angopurtem dang taruba ghonda 24 nungi ghonda 72 tsüngda Andhra Pradesh, Odisha aser West Bengal tzüyimi ango apui maotsü tekümdangtsü metedaktsüogo.