Yipru agi kiojen raksartem dang jenjang dalang agi oset ayoktsü

Mkg. May 04 (TYO): Tan yipru agi kiojen raksatsüba kitem yanglutsü asoshi dokan nung nüngdak oset alidang jenjang tajemba aser dalangba agi angutsü ta Mokokchung Chamber of Commerce & Industries (MCCI)-i metetdaktsüogo.
Tan yipru mopong agi kiojen chireptsür alirtem ki asütsü tenzükdang Mokokchung town nung hardware aser electrical dokan nung jenjang tajemba nung agütsütsü lemtetogo, anungji kodangsa iba teyari agitsü arudir pei yimtsüng nung putu menden nung mendenbuba mesüra town nungbo mepu nung mendenbuba mesüra GB kati züluba kuli MCCI dangi bener arutsüla, ta MCCI tir Tsükti Longkumeri metetdaktsü. Ano nüngdakba purtemi MCCI president den 9436006062 ajanga metetpelatsü akok.
Ano, tawa yipru mopung agi kiojen raksatsürtem nem agütsütsü asoshi MCCI aser Mokokchung Entrepreneurs Consortium (MEC) shia Rs.50,000/- Mokokchung DC nem agütsü. Iba mapang pelaba o ka lemsatepdang, Mokokchung DC-i iba osang zülur dang Officers’ Club Mokokchung-ia kasa teyari atema sen Rs.50,000/- agütsüogo ta metetdaktsü.