Yipru agi teraksa ajurur kibongtem nem NSDMA-i teyari agütsür

Chuchuyimlang Block, EAC Meyazungba den NSDMA & DDMA ketdangsertem aser Chuchuyimlang Village Council Chairman, Aosanen nungertemi ketdangsüa teyari agütsüdang tangokba noksa nung angur. Chuchuyimlang, May 9, 2016.

Chuchuyimlang, May 9 (TYO): May 1, 2016 nü yipru tulu arua Mokokchung district kübok yimtsüng 41 nung teraksa ajurur kibongtem nem Nagaland State Disaster Management Authority (NSDMA)-i teyari agütsüdaki. NSDMA-i item teyariji district administration den yaritepa lema agütsür.
Hombarnü yangi Chuchuyimlang EAC block kübok teraksa ajururtem nem NSDMA/DDMA ketdangsertem den EAC Meyazüngba aser pei yim aser town nungi lennirtemi anepalua sorkar nungi aruba teyaritemji lemshidaki.
Teraksa tapu asemsü; mezüngbuba nung okshia raksaba, tanabuba nung kanga mejungi raksaba aser tasembuba nung tera raksaba ta küma lemsar teyariji agütsür. Iba teyariji India sorkar inyakyim dak ajemdaker agütsür, ta DDMA ketdangser kati ashi.
Chuhuyimlang EAC block nung ya yimtsüng tenet (7) aser town asem (3) lir, aser item nungji teraksa ajurur kibongtem ajak agi 316 liasü.
Kasa teyari ya Kubolong block nunga teraksa ajurur kibongtem nem lemtsüdaki, ta NSDMA ketdangsertemisa ashi. Ongpangkong block aser Mangkolemba sub-division nunga yakta lemtsütsü, ta parnokisa osangzülurtem den jembidang metetdaktsü.
Tang agütsüba teyari ya tanabubaren teyari asütsü. Mezüngbuba teyariji lendong atalokba anogo May 1, 2016 nüto agütsüogo, ta DDMA ketdangsertemisa ashi.
Yimtak putu yimsüsür aser town balala nungi lennirtemi state sorkar aser NSDMA dang teyari tulu agütsüba asoshi pelaba lemsatepa liasü.