Yipru ajanga sentong agidak raksatsü; BJP sentong nung adener maliasü

Guwahati, March 26 (Agencies): Tanü Bongaigaon nung Bodoland People’s Front (BPF) atema Kokrajhar candidate Pramila Rani Brahma indang sentong ka agitsü ayongzük saka yipru süiba ajanga sentong agitsü atema renemba ajak raksatsü.
Yipru ajanga yindong ajak laodaktsü aser süki uptoktsü. Iba sentong nung nisung 6,000 shi adentsü adenshi.
Sentong nung Bodoland Territorial Council (BTC) tanishir Hagrama Mohilary, Rani Brahma aser tangartemi jembitsüba liasü.
“Yipru ajanga timtem agütsü saka iba ya onok atema tamaitsü tajung lir. Ozü candidate-i Lok Sabha menden takok angutsü” ta Mohilary-i osangbener dang ashi.
Osangbenertemisa pa dang ‘Chowkidar’ ta pa tenüng jakdang zülutsü asü masü ta asüngdangdang “Tazütsü atema ni mapa kecha meinyaktsü” ta langzü.
Ano külen, Karimganj aser Guwahati nung Bharatiya Janata Party (BJP) election rally tem nung nisung tadenertem maliasü.
Guwahati kübok Borjhar nung BJP atema Guwahati candidate Queen Ojha indang nüboyimba sentong ka agitsüba liasü saka yirpu kanga aonba ajanga sentong agidak raksatsü aser nisungtem marutet.
Karimganj nunga party prabhari Mahendra Singh, Assam minister Parimal Suklabadya aser Kabindra Purkayastha nungertem sentong ka nung adentsü ao saka sentong agiba tesem tazüng liasü.
BJP-i kanga meranga nisungtem anidentsü atema mitai lema mesüzük saka nisungtem maru.