Yipru aser rü lendong atema NSDMA-i sen crore 2.5 teyari agütsü

Dimapur, May 14 (TYO) :  Taoba ita ka tsüngda Nagaland kübok tesem balala nung yipru  mopung aser rü ajanga takoksa bener arutsür nem Nagaland Chief Minister aser Nagaland State Disaster Management Authority (NSDMA) Chairman, T.R Zeliang-i sen crore 2.5 jungnüa teyari agütsüogo.
May 2, 2016 nü Chief Minister T.R Zeliang-i Mokokchung district kübok Sungratsu nung Moatsü benjung nung adentsü aodang, pai helicopter ajanga takoksa ajuruba tesemtem repranga senzü aser kasa anogo nungsa pai Deputy Commissioner ket nung sen lakh 10 teyari agütsü, ta Media Cell, Chief Minister’s Office, Nagaland sangdong ka nung metetdaktsü.
T.R Zeliang-isa Zunheboto aser Mon district tem atema sen lakh 10 aser Longleng district atema sen lakh 5 teyari agütsüba metetdaktsü, ta sangdong nungsa shia lir.
NSDMA-i Chief Minister nem tanü osang sangoktsüba nung, Zunheboto district kübok Suruhoto nung rü tsükba lendong nung ki 671 aser tsünüsenbongtsü hectare 30 raksatsü ta shia lir aser iba asoshi Disaster Management Department-i sen 39,58,900 teyari agütsü.
Mokokchung district nunga yipru aser rü lendong balala nung ki 1,382, electric yindong 71 aser embankments 50 raksatsü. Item teraksa atema Disaster Management Department-i sen 72,90,800 teyari agütsü, ta Media Cell, CMO sangdong nungsa metetdaktsü.
Longleng district nunga yimtsüng 34 nung rü ajanga takoksa bener arutsü aser iba mapang ki 643 raksa aser Disaster Management Department-i sen 23, 48,700 teyari agütsü.
Mon district nunga ki 614 den gari lenmang, power line, school aser alutem aika raksa aser iba asoshi sen 53,22,300 teyari agütsü.
Wokha district nung, rü aser yipru ajanga ki 449 raksa aser iba atema Disaster Management Department-i sen 18,14,400 teyari agütsü.
April 29, 2016 nü Kohima aser Dimapur nung aser ano sub-division balala nung yipru mopung süiba osang angazük saka iba mapang teraksa balaka maliasü. Iba osang angashiba sülen Disaster Management ketdangsertem tesem tonga ao aser district administration den yaritepa osangtsüsang agitep, ta CMO sangdong nungsa metetdaktsü.
Chief Minister’s Relief Fund nungi Chief Minister-i teyari agütsüba aser NSDMA-i agütsüba senji den grant in aid ama asütsü atema India sorkar den tongtepratepdar. Tang Chief Minister, T.R Zeliang Delhi nung oa lir aser pai NSDMA ketdangsertem nem iba tetuyuba agütsü, ta Media Cell-isa metetdaktsü.