Yipru tesashi sülen kibong million 2.4 nung light marur

Boston, Metsüremi 03 (Agencies) : Yipru mopung tesashia aruagi nisung pongu taküm samaba sülen United States anüdoklentip tsütsü nungi iba yipruji tanü Küptoknü nungibo süzüka aotsü, ta tsüngsang ponung takzüertemi metetdaktsüogo.
Iba yipru tesashi ajanga tesem nung yimdongtem tzü agi metsüng, mopung tesashia aonba den light raksatsüogo.
Region nung rüjep aser tzünglu süzüka oaka mopungbo maneni ghonda nung mile 50 shi sashia aontsü, ta National Weather Service ajanga shiogo.
Boston yimti aser anasa aliba tesemtem nung yipru ajanga tzüyim nungi tzüsem tulu yimdong tashi nungteta adoka taküm kümbo tzü sashia metsüngbanga lir. Ghonda nung mile 90 tashi mopung tesashia aonba mapang süngdongtem laodaktsüba den power line aika raksatsüogo.
Ibaji ajanga tanep yakta nungi Northeast aser Midwest tsütsülen kibong million 2.4 shi light mali nüburtemkanga dang timtemdagi. Deobar tashi nungang light yoktettsü südi ta utility company-temi nüburtem dang shiogo.
Iba yipru tesashi ajanga alima raksatsüba sülen Virginia Governor, Ralph Northam aser Maryland Governor, Larry Hogan nati parnok tesem nung ‘emergency’ osang sangdonga lir.
“Shisa amshia inyakang, tekümdangtsü metetdaktsüba ama tashi angang, aser kokra tema adoka gari lenmang nung tejaja,” ta Hogan-i kümdanga alitsü osang ka sangdongogo.
Liso osangbenertem aser police-i ashiba agi, region nung süngdong laoa nisung pongu züksetogo; parnok rongnungji tebur chanu ana densema liasü.
Taküm 2018 küm tenzüker tan agi tanabenbuba yimdong nung tzü metsüng adoka nüburtem timtemdagi.