Yisu Khrista takar süaka, asenok takar kümdaktsütsü asoshi pa sensaker aküm

~ L.Kika Pongener.

2 Korint-8:9. “Kechiyong asen Kibuba Yisu Khrista takar liaka, aji saka, Pa sensakba agi nenok takar kümdaktsütsü asoshi, Pa nenok atema sensaker aküm, iba taochi nenoki metet”.
Asenoki amangba Tsüngrem ya sensaker Tsüngrem ka masü, Pa tangar dang kua kua ta meshimetsütsüsa sensaker ka masü. Israelpurtem Ijip lima nungi Kanan limai adokdang, lenmang nung Mosa dang parnok nem Ijip lima nung chiyongba ama chiyongtsü kua ta meshi. Aser Mosai Tsüngrem dang Israel nuburtemi pa anema nemnemba indang ashi. Aser Tsüngremi anung nungi “Mana” tsükdaktsü, aser Israelpurtem aji chir tip atem.
Israelpurtemi shi chinüdang Tsüngremi Opiya ozü poktetdaktsü aser tzüradang lung nungi tzü pokteta jemdaktsü. Yisu alima nung alidang kenü anogo pai tetsür-tanur mazüng nisung meyi pongu shi Ango ana aser Amtsük pongu agi peria chiyungdaktsür külena ano tanük-tari molok ter ana tashi anüng. Atangji asen Tsüngremji sensaker masü saka takar Tsüngrem lir.
Ajisüaka, Tsüngremi asenok dang nungi tepela tenla, temoatsü tenla, tenüngsang tenla imlar aser tershilem tenla akhanger. Ajioda, asenok dang nungi tenla aginüba, idangji-bo Tsüngremji sensaker aser meshimetsür ka amai bilemtsü akok, ajisüaka aji asenok takar kümdaktsütsü asoshi pa sensaker ama akümerba dang ta Tsüngrem o jagi ashir. Korint nunger dang Paul-i ashiba o-ji, “Kechiyong asen Kibuba Yisu Khrista takar liaka, aji saka, Pa sensakba agi nenok takar kümdaktsütsü asoshi, Pa nenok atema sensaker aküm”. Tsüngremi asenok dang nungi pai moatsüba ali rongsen nungi ter nung ka “Tershilem” akhanger.
Asenok nem pai jenti moatsüba asoshi pelar-a ta, Tepela, Temoatsü aser Tenüngsang Tenla” aginür aser yimlar. Ajisüaka, iba tenla asenok nungi akhangba aser meshibaji pa sensakba aser anüngakhongba agi masü, saka asenok nem talila meyipa moatsütsü asoshi pa sensaker amai akümerba dang ta asenoki Tsüngrem o nungjagi tejangja angateter.
Aji oda, asenok tamanger shirnoki atsü-ayung mesüi, menungnangi Tsüngrem nem mulongsoa tenla agütsür, parnok nem Tsüngremi mola-moshia moatsür. “Ku kidang chiyungtsü akatsü asoshi nenok tershilem ajonga terizüngdak kidangi bener arung, aser iba amai ni tendangang, ta temeranger Kibubai ashir, aser ni anüng kichiba lapoktsüdisü melapoktsülir, aser nenok asoshi temoatsü moshia mayim tashi meküpzüka yokdisü meyoklir tendangang. Aser kin ajaki nenok dang temoatsü ta ajatsü, kechiyong nenok tepelatsü lima akümtsü” (Malaki-3:10-12).
Tsüngremi aseni züsentetba süngjanglijang, aonsotsü aser aseni mesütetba kiset shiruru nungi ter nung ka, aji kü meyong, anungji kü kidangi bener arung aser tenladak sapang nung tokjang ta ashir. Asenoki aji oda, indang-indanga ochishia agütsüra, Pai anüng kichiba lapoker asenok nem mola-moshia mayim tashi moatsütsü ta ashir. Shisa taka Solomon-i ashir- “Ne chiyungtsü tzüma nung prokang; kechiaser nai anogo aika lir aji angutsü” (Sayu-11:1).
Chiyungtsü tzüma nung paoktsü nung kechi meyipa angutsü…!!!??? Asenoki repranga lia tenük mesepshi nung tzüma nungji ponger oadoktsü. Ajisüaka, Tsüngrem o-i ashibaji, asenoki Tenla kidangi orr tenla agütsübaji dang tenla masü, saka sensaker, mekokminer aser lajartem dang meimba, aji-a Tsüngrem nem tenla agütsüba den saku lir.
Aseni asen nem kodanga meyipa magütsütettsüba nisung nem kecha mesasai odang agütsütsüba indang ashir. Tzüma nung chiyungtsü inoktsüba kodaser tanaben bena arutsü …??? Makamaiter, mekokminer, sensaker aser lajar ka nem agütsü nung koba anogo nung parnoki nai agütsüba amai ne nem meyipa agütsütettsü…??? aji kodanga makoktsü.
Ajisüaka, Tsüngrem o jagi ashir, anogo aika lir külen nai aji meyipa angutsü, kechiyong aji nai nisung dang ajunger masü, saka Tsüngrem dang ajunger. “Nisung kati mukurui agütsür, saka tali akar; tangar kati pai tagütsütsü tim soita ayur, saka tanüng dang tendaktsür” (A.Shin-11:24). “Shibai item tilatem rongnung ka nem tzüzü marok ka danga tajemtsü agütsüdir, atangji pai koda-kang pei tajangzük mesamatsü” (Mathi-10:42).
Aji oda, timtemer mekokminer dang yariba temoatsüji parnok taküm aser kibong nung anema aser arishia lidaktsür. Tenyartem mapang nung, Japa yimti nung tetsür ka tenung agi Dorka liasü, lai mapa tajung aika inyak aser angati aika agutsü. Kenu anogo la shiranga asü, aser la meimertemi la shia arudaktsütsü asoshi Tsüngrem dang ajangajanga sarasadem. Ajiser, Peter anasa lir ta osang angashir parnoki Peter tajai yok, aser Peter yakta arur Tsüngrem dang la asoshi sarasadem aser la shia arudaktsü (T.Mapa-9:36-40).
Atangji, shirnoki mapa tajung inyaker parnokji nubur mechi nung, Tsüngremi moatsür aser arishia agutsür ta iba laishiba nungi asenoki angur. “Tejungnuba takümji kaa kümdaktsütsü; shibai tzü ainer pa dak-a tzü indaktsütsü” (A.Shin-11:25). Atangji asenoki amangba Tsüngrem ya sensaker Tsüngrem masü, saka takar Tsüngrem lir. Ajisuaka, asenok takar kümdaktsütsü atema pa sensaker ama akümer. Anungji asenoki Pa nungi iba temoatsü senmangji agir temang shi aser tanela taküm anaprongla nung takar küma alitsü angazükdi.