Yisu shia aruba dak mamangra tamanger masü

April 13, 2017 : “Yisu sür shia aruba dak mamanger aser tekülem kidangi anasa maoertemji tamangar masü,” ta tesüiba mapang Chubatsür atema Chaplin inyaka alisang Rev Dr Gavin Ashenden-i ashi.
Pai ashiba agi, tamanger pezüsü lemer küsüi Yisu shia aruba dak mamanger ta ashir anungji parnokji tamanger masü.
Rev Dr Gavin Ashenden-i, Khristan pur nisung pezü rongnungi kati Yisu tasü madak takok ngua shia aruba dak mamanger ta sangdongba ajanga Britain sobaliba aser Tamangba yimsü makmakshimakdaktsür, ta ashi.
“Asenoki tetetzüji kanga junga angatettsü nüngdak. Yisu tasü madak takok ngur shia aruba asenoki temulung ajak agi agisüktetba ajanga asenok tamanger kaka kümdaktsür, saka nai ibaji magizüktetra na tamangar ka masü,” ta pai shisem.
Palm Sunday nü asadangba ka ajanga ngutetba agi Khrista dak amanger noklang nung shilem 23-i Yisu shia aruba dak mamanger.
Aji süaka mamangertembo nisung 10 rongnungi katibosa Yisu tasü madak takok ngur shia aruogo ta amanger.
Nisung 2000 shi dang nungi iba osang asadangtsü merangba mapang nisung noklang nung shilem 46-i sür ano taküm alitsü ta amanger aser mamangertem parnok nisung pungu rongnungi kati kasaji ashir.
Manchester nung Bishop, Right Reverend David Walker-i, tenla kidangi maoertemi pei amangbaji kanga akanga amita aliba bushisüngdang ka ajanga nguteta lir, ta ashi.
“Mamangertemibo parnoki amangba tsüngremji kanga tashi ita amanger,” ta pai ashi
Tenla Ki ka nung tekülem agiba mapang Muslim indang Koran züngdangtsüba Arogo ka pai aitsüba sülen Dr Ashenden ya taküm January it nung chaplain mapa nungi anen.
Ni yimjak nung tamangba yimü pusemba atema mongintemi ni aitsür, ta Dr Ashenden-i ashi.
Pai taküm March ita nung Church of England toktsü.