Yisui ajar (Mathi 4:18-22; Mark 1:16-20).

“Ni shiba yoktsü? Onok asoshi shiba aotsü? Ni yangi lir, ni yokang.” (Isa. 6:8).
William Carey (1761-1834) dang Tawa Mission tebu ta ajar. Pa tsüngsem yanglur liasü aser Laishiba meyiper aküm. Tia balala nung Tsüngremi kija ajaba Laishiba ajunga nung asenoki angur. Mosa sepoy ka liasü aser Tsüngremi Pa pur Ejip nungi anitettsü aja! Dawid sannüker ka liasü aser Tsüngremi Pa nübur madak yimsü asütsü aja! Amosa sannüker ka liasü aser Tsüngremi ainkar asütsü aja! Yisu sung mapa inyaker ka liasü aser Pa küm semer alidang toklang tenzükba mapai aja.
Peter ango pur ka liasü aser zütsük yutsür Pa sülen anidaktsü aja. Mathi alimelen sarur ka liasü aser Yisui pa mapa toktsür Pa toklang tenzüktsü aja! Paul süki yanglur ka liasü aser Tsüngremi alima ajak nung tenzüktsü aja! Luke mozü amshir ka liasü aser pai Paul den missionary mapa nung yaritepa aden! Ne mapa kechi südir süang, Tsüngremi na ajatsü akok!
Tejen Lai aser Tasen Lai ajunga nung Tsüngremer mapa inyaker nüngdakba kasa lir. “Alu tarutsü junga mesünga mina lir saka inyaker ishika dang lir!” (Mt. 9:37). Tsüngremer mapa nung teti menden tazüng lir! Doctors, engineers, ozüng mapa, tesayurtem mapa nung tetoktepba lir. Saka Khristan mapa nungbo ishikadang. Nai iba tayongzükba (challenge) agizüker asü? Nai zülutsü nung jangrar asü? Na Laishiba meyiper ka asütsü akok. Tesem aika nung pei oshi nung Laishiba maka lir. Medical missionary makaba jaka aika nung lir. Na medical missionary ka akümtsü akok. Tsüraburi pei chir sempet metetta ajungshitsü akok.
David Livingstone (1813-1873) Scotland nunger tesem tasen bushir (explorer) ka liasü aser pa missionary ka ama ao. C.T. Studd (1862-1931) England nung nüngtugu cricketer ka liasü aser pai missionary mapa agizük.
Yisu aser Paul sayutsüngibaren nung tetsürtem dena liasü (Lk. 8:1-5; Fil. 4:3). Mrs. Gladys Stanesi tebuba aser jabaso ana rongsetaka (January 23) maneni kasa jaka nung Tsüngremer mapa maneni inyak , kechiaser, “Idakji taküm ka dang lir; ibaji yakta süitemtsü, Khrista asoshi kechi inyak ibaji dang anünga alitsü.”