Yisui ashi ni sannüker tajung

– L. Kika Pongener.

Yohan-10:11-16. Ni sannüker tajung, sannüker tajungi santem asoshi pei taküm yutsür. Shiba sannüker masü saka aayanger dang, pai Tsünu aruyaa angur aser San toktsür ajener; aser Tsünu jagi parnok apur aser jenshidaktsür. Pa aayanger ka dang aser santem asoshi mebilemer, anungji pa jena aor. Ni Sannüker tajung, aser kübui ni kechi koda metet yamaji ni kü meyong san metet; aser santem asoshi ni kü taküm yutsür, aser iba san ki nung matenba kü meyong ano tanga san lir itumjia ni anir arutsüla, aser parnoki kü ola angatsü, aser parnok Sannüker ka küpok san telok ka akümtsü.
Kodang sannüker ta südir asenoki Pastor ka dak tang rangloker, saka Sannüker ta süra, arogo nung Toklang tenzükertem aser Tongti tenzükertem ajak dena lir ta angatetdi. Yisu-i pa sannüker tajung ta shiogo, kechiaser pai pa taküm rangpen pei santem asoshi kangkidong nung tenla agütsütsü-a mulonga liasü. Pa sannüker tajung kechiaser tebu Tsüngremi pa koda metet aser meim, ajioda, pai-a pa santem metet aser meimer. Sannuker tajungi san tokür-tokü kidangi adoker san ka madokba mechi tanaben meyipa orr arem meta sema mangu tashi bushia senzüba, Yisui tasen lai osang tajung nung o entepba ka agi atishia jembiba asenoki angur. Aji oda, sannüker tajung kati pei santem rongnung jenjang tulu-tila, tashir-mashir, takar sensaker ta, kecha tebendang makai sakü-kü mesentoki ajunga bushir.
Yisui Yihuda nungeri sempaba alimelen sarur Zakia-er kidang oa anen, aser Yihuda nungeri kheni kin mechitepba Samariatsür ka den terotu nung tzüpo nung ajurua sensak-asem. Yamaji Yisui Yihuda nunger sobaliba yimsu ozüng agi jentoka-adokba aser temenen nisung ama züngshiba nisungtem ajak mesentoki bushi. Palistan limai odangertemi otsü ashiba agi Palistan lima-ji san mesür aika aliba lima ka lir, aser sanji telok telok sannüker kati anir arem moapu rem lanu alidak anir oa nüka chiyimdaktsür. Sannüker jagi rangdong, ajok talang ka nung tamaitsü alenloker aji ammer san telok tejaklen ser anir, aser kong koba tesem nung anentsü, koleni aotsü item ajakji rangdong jagi tamaitsü sayur. Ajiser, santem jagi iba lenniba nungji tashi angaa anidaker… ta anogo shia pei kibur santem arem moapu rem tajung peria alidak, tzü tajemtsü peria akadak tesem bushia anir oa chiyimdaktsür. Aser lungren lungbang nung tsüka meyirudaktsüi kümzüka ayutsü atema pai mapang aben parnok chiyima alidak tesem ajunga mita repranger aser shiruru tesashi arua tepset’a lir ta lijakjang ammer mita anüker. Aser, nikongdang mapang shidak nung kibur kidangi anir orr ka-ka züngdanga san ki nung anioker ta otsü angazük. Yisui pa alima nung alidang ibala sannüker ka den atishia jembi südi ta osang tajung kakettem nungji tejangja angur. Yamaji Sannüker tajungi rem tajung alidak, tzüpokdak tajung akadak bushia anir oa chiyimdaktsüba ama, tekülem sentep shia alima tensa tia den tapet, Tanela chiyungtsü tasen tasen melentepa, lai o temeja tarok lesson bushir sayua, arogopurtem Tanela nung tzüratema temoatsü ngudaktsür.
Shirem aser Tsünu tesashi nem santem mengusetdaktsüi, lungren lungpang nung tsüka meyirudaktsüi, kümdanga mita anükba ama, yimden aser loktiliba temzüng-ozüng, sobaliba tejen yimsü-yimpong, laishiba o aibelena sayuba, ibala ama temenen tesashi tenokdangtem aser talenba tapu tapu ajanga Khristar arogo nung arua anokshitsüdang, Sannüker tajungi kodanga züba-züba senzüka metoktsür, saka item anema tasü-ita nokdaker aser item tenokdangbatem nem Khristar arogo malendaktsüi kümzüka ayur. Aji oda, “Sannüker tajungi santem asoshi pei taküm yutsür, saka shiba sannuker masü, saka aayanger dang, pai Tsünu aruyaa angur aser santem toktsür ajener”. Shirnok aayanger Sannüker lir, parnok jagi pei dang taa teperi ngua anisüngzüka lirabang, pei dang tenüng tajung ngurabang, pei aliba atepzüng nung teraksa liaka, aser mepetmesü liaka, iba indangjibo kecha khuret mabener aser shisa mebulur, kechiyong parnokji aayanger dang. Sannüker tajungi arogo nung tashiyim amshia kibur makümer, arogo menden yimsüsüba sabang merük-merüka wazüka ayur, rongsen nung tenük meyoker, chidiyungdi masür, ambangyim, merumero, aser pei ajungtsü mebushir, saka pei santem aser arogo ajungtsü indang bilemer.
Sannüker tajungi pei santem rongnung tulu-tila, takar-sensaker, tashir-mashir kecha mebendanger, saka ajak den sakü-kü tesendaktep tajung ayur. Alima asünungji lokti nung tanak-temesüng… ta telemsa alitsü akok, ajisuaka, Sannüker tajungi tip külen dang tenük meyoker, saka ajak tsütsü tejak shitsür, ajak den yimjung nung alir. Sannüker kaji Arogopurtem ajaki ketasena, sapua, meima, akhümtsübutsüsa, jembishinu aser libaliro ajak nung kanga kümdanga azüoka alir. Sannüker tajungi tongtipur, tongtipang nisung dak rangloker masü, lokti tashi tsüngen tsübua masü, saka Yisu Khrista dak rangloker Khristar Arogo kaji anir. Mathi-10:28. nungji züngra- “Shiri temang tepseter, saka tanela takümbo tepsettsü makok parnok tetsübu; saka shibai tanela aser temang anaprongla molumi nung samatsütsü akok, pa-ang tsübuang ” ta shia angur. Khristar Arogo ka nung tongtipur kar dak rangloker, mesüra lokti tsüngen tsübua, Khristar Arogo dak mapetba mapa metetsümonga inyaktsübaji Tsüngrem tsüngdang khuret tulu asütsü. T.Ken-118:8. Nungji züngra, “Nisung dak tamang akadang nungibo Kibuba dak temulong alem tajungba. Tongtipur dak tamang akadang nungibo Kibuba dak temulong alem tajungba”. Arogo sentong aser inyakyim ajak nung tesülen nem-nema anidakertem, nüngsen jembirtem, tai aputsü merangertem, item ya alima mesama tashi odang alitsü, aser item dangji tesashi Tsünu ta ajatsü akok.
Tanu Arogotem nung Arogo menden telung nunga, item Tsünu tesashi meyoktepa aliba ajanga Khristar Arogo aika Tanela nung rajang küma shirangdaktsür. Anungji item tesashi Tsünutem nungjagi Khristar Arogo kümzüka ayutsü asoshi Sannükertem Per ama shisa taka aser Posu ama tongmelang asütsüla. A. Shin-16:25. nungji züngra- “Nisung tsüngdang shidak mesükba lenmang ka lir; saka iba tatembangji tasüba lenmang”. Mapang kar nung mapa karbo, nisunger tsütsü nungibo tim mapa amai, ochi amai asütsü akok, aser lokti teimbai mulongba-a asütsü akok, saka Khristar Arogo dak mapetba mapa ka süra, item ama jagi Arogo anokshitsüdang, Sannükertemi tasü-itta Arogoji kümzüka ayutsüla. Anungji iba ama tensa tia ajak nungji Laishibai kechi tuyur aser Tsüngremi mulongba kechi…??? ta sarasadema telemtetba agitsü kanga tongtibang lir. Yisu Khrista anema Yihuda nunger ajunga den Rom sepoy-tem dener, “Pa Kangki nung angenlokang”, “Pa Kangki nung angenlokang”, ta lokti tulu tetsübutsüka lentong-lentong taren-taren sena nungbanger ayimten, aser tip külen Yisu Khrista Pa kija dang….Pa nütsüngtemi-ang sünga pa toktsür jena ao. Ajisüaka, Easter Sunday anepdang, Pa shia aruba ajanga, Yisu Khrista Pa kija süaka temeden angu aser takok angu, kechiyong Yisuji dang ochi liasü. Atangji alima loktiliba nungbo lokti tulubai mulongba ta-ka asütsüa akok, ajisüaka, Khristar Arogo nungbo nisung ka kija süaka pa/laji dang ochi temeden asütsüa akok.
Ajisüaka, kangasa tesasatsüka, tanü putu Arogotem nung, Yisu Khrista tekolak aser kibur masü, saka taka-taiter, tashi-tawar, tongtibang lenir, ambangyim tesashi tenzüker-ang kar kibur kümdaktsür, item nemji Arogo amokbangdaktsür, Arogo mendenji pei jurila meyong ama atsüshia anishidaktsür, aser shingaia nunga ta meshitet, tsübuseta ola madoki anidaker, aser idangji Khristar Arogo dak pongmen aser tarak ketdaktsür aser tanela nung rajang küma alena ayur. Anungji Sannüker-temi Arogo menden yimsüsüba tashiji, laishiba tesayuba nung akang-akanga ammet-ter, tasü itta manira, Khristar Arogoji alima nem moksepdaktsütsü aser alendaktsütsü. Ezekiel-34:7-10. Nungji züngra, “Anungji nenok Sannükertem Kibuba o angang, kü san telok tepsettsü kümdaktsü, kü santem moapu nung shiruru asoshi chiyungtsü aküm, aser Sannükertemi kü santem mebushi, saka Sannükertemi parnok sasa pei mesü”…..”Ajiang ni Sannükertem anema lir, aser parnok ket nungi ni Kü santem akhangtsü aser parnok santem mesüba nungi anendaktsütsü” . Anungji Sannükertem aser tenzükertemi Khristar Arogo ka nungji, nisung tongtipur masü, lokti tulu masü, saka Yisu Khrista Kibur südaktsütsüla, Khristar Arogo ka nungji Yisu Khrista topur ajung ngudakja, Yisu Khrista ronem menem-a, Arogopurtem ajunga pelaseta, longjema, meimtepa alitsüsa, aser tenla kidang tekülem sentep nunga temulongjang ka sur, menurem jakden dener Tsüngrem külemtsüsa, Khristar Arogo kaji alima tashitemetet agi masü, tashiyim agi masü, saka temeim aser taochi agi anitsüla. Yisui shiogo, ” Ni Sannüker tajung “, Anungji Khristar Arogo nung Tenzüker aser Tenzüklatem ajunga Sannüker tajung ka-ka asütsü, Yisu Khrista taküm aser jakla nungi angazükdi.