Yisui sarasademtsür

Khristan taküm ka nung teti tatidang lir. Aji oda, Khristan taküm kaji  temalen sang aser telonglen tatidang agi meketbanga lir ta asenoki ken nung atener. Yisu taküm alidang pa nütsüng rongnung Pai Peter dang kanga meim. Kenü anogo Pai Peter dang ashi, ‘ Simon, Simon, ajiang , Satani tsük ama sepdoktsü asoshi na agitsü mepishir, saka nü tamang tamakok mangutsü asosh ni na asoshi sarasademtsür, anungji na kodang tanaben temulung meyia arudir, idangji nü adianutem tashi itdakjang.” Luke 22: 31 nung iba tatalokba ya asenoki angutsü. Yisu kangkidong nung metatsü asoshi mapang nenjunga arur ta Pai meteta dang liasü. Yisui pa kodang, kong shibai ashioktsütsü aser koma timtema reshikangshi ajurutsü, Pai meteta dang liasü. Iba ama shisabolu mapang nunga Pai Peter tamang nung akangshidaktsü . Peteri taonung mesüra asüng parnok dak kechi ataloktsü memeteti liasü, saka pa Kibuba Yisuibo Satani pa atidangtsü aser pa yangji tsüktsü ta meteta dang liasü. Iba jagi pai Peter dang Satani na atidangtsü asüngdanger, anungji kümdanga saksalema liang, maneni sarasademang aser na kodang tatidang nung tsükdir, idangjisa ano na temulung meyipa arua nür medemer aser adianu tamang nung tashi itshidakjang ta lendong aser tatidang agi parnok tonga marudang shiadoker liasü. Na atidangtsü Satan renema lir saka na tamakok mangutsü asoshi aser teti taküm mesamatsü atema ni tebu dang sarasademtsür ta Yisui Peter dang ashiba o ji asenok atema tanüa tashi tasen angudak aser tejenokdak tajung ka lir. Peteri pa atidangtsü Satani renembajia memetet aser pa tamakok maludaktsütsü atema Yisui pa asoshi sarasademtsübaji pai memeteti liasü. Asenok Khristan takümji yamaji lir. Khristan-temji asenok lir aser Satan mapaji asenok atidangtsü aser asenok mashileni anisatsübaji lir. Ajisüaka, asenok tasü aittsü aser temulung alemdak ka lir, aji Yisui teti asenok atema tebu dang sarasademtsür ta asenoki bilemtettsüla. Tatidangji temenen masü saka tatidang nung tsüker temulung meyipa marutetbajiang temenen asütsü. Yisui Peter dang ashibaji jungjunga bilemdangra, Satan ajanga pa dangi tatidang arubaji pa tamang nung akangshitsü aser par adianu tashi itshidaktsütsü asoshi liasü. Aji oda, kodang Peter tatidang nung tsüker külen pai asüktema jepa temulung meyip, iba sülenbo pai Kibuba Yisu dang nangzükba ama Yisu asoshi pa taküm agütsütsüa metsübui aküm. Aiben asenoki taküm nung tatidanga asenok dangi dang arur aser asenoki dang ajurur ama bilemer. Asenoki aiben tatidang nung tsükbaji joko kodanga mesaktettsüsa maksü ajuru ama bilemer. Iba jagi, asenoki temulung memeyiper. Itemji satani tsüksü ama sepdokba purtem lir. Ajisüaka, Yisuibo nai ajurutsüba tatidangji nai majurudangi meteta dang lir aser iba tatidang nung tamakok mangutsü asoshi Pai Peter atema sarasademtsüba ama na atema sarasademtsür. Aji  oda 1 Korint 10: 13 nung ashir, nai mekoktettsüsa tatidang marudaktsütsü aser tatidang nungi jenbutsü lenmang renemtsütsü. Iba dang nungi teyari tuluba kong nungi arutsü asenoki imlar ? Kodang tatidang arur, asenok atemabo ajungbena asütsüa akok saka ibaji aseni majurudang iba tatidangji akoktsü atema Yisui na asoshi sarasademtsüogo ta nai bilemang. Rom 8 :34 nung ashir, ” Yisui asenok asoshi mepishitsür.” Ajisüaka, Yisui mepishitsüba ajanga asenok tatidang madak takok  angubaji tatembang masü, saka Tsüngremer nükjidong ka lir, aji asenoki asen adianu tashi itshidaktsütsüla. Tetezü asenok tebok sünga alibaji teperi masü, asenoki anguba  takokji tatem masü aser asenok temulung meyipbaji asen kija anisüngzüka kazütsü asoshi masü, saka asenoki anguba takok aser temoatsü jagi tangar tashi itshidaktsütsü asoshi lir. Yisui asen atema sarasademtsübaji ibaji atema lir . Ibaji mamadokli.