Yisui takok nung tembanger ao

“Kechiyong shibai nenok dak mapa tajung tenzük, Pai Yisu Khrista anogo tashi ajisa abensatsütsü ta ni amanger” (Filipi 1:6)

Kechisarena ajak tatembang kati arur. Kaket shisatsü bushiba süshia, tejangrabatem, health aser tashi aser arishi. Ajak tatembang katibosa arur. Yisu Khrista-a Tebui tenyaba wadang ka atema iba limai aru (Yohan 6:38), aser tembanger takok nung ao. Pa sentsüwangshi nung ayipa aobaji tebui tenyaba takok nung tembanger aoba indang angateter. Kechiyong Yisu-ia ashi “pei mulungba inyaktsü asoshi masü, saka tenyabai mulungba inyaktsü” ta shia lir. Adangji Yisu Khrista tatembangji takok nung tembangba indang angazüker. Tsüngremi asenok ajak sentong kaka nung yanglu, aser pa mesükba nung yangluba taküm shia jagi iba nükjidong atalokja tembangtsü Kibuba dang pa sentong asüngdangtsü nüngdaker. Kechiyong koba mapa südir sang, ajak tatembang kati arutsü. Tenyar Paul-i Tsüngremer sentong tajungji tatembang kati takok nung bener arur ta meteta pai ashi, “shibai nenok dak mapa tajung tenzü, Pai Yisu Khrista anogo tashi ajisa abensatsütsü ta amanger.” Asenoki tenzükba Tsüngremji tatembang aser alizüng dak ranglokba Tsüngrem ka lir. “Langka tetenzük dangbo iba tatembangji tajungba lir.” (Sayutsüngir 7:8). Yisu-i takok nung tembangba ama asenok koba mapa südir sang takok nung tembangtsü merangdi.

Sarasadem
Kibuba Yisu nai iba lima nung nungloktsüba wadang takok nung tembangba ama, nia takok nung ne tenyaba wadang takok nung tembangtsü ni yariangma. Amen