Yitachu-i 7 buba Silver Cup T20 Cricket Tournament lapoktsüogo

Kohima kübok Jakhama Local Ground nung Nagaland School Education & SCERT Minister, Yitachu-i Village Council Chairman, GB-tem, yimtsüyimbotem, asayamong tayongertem aser asayamong tetenzükba asaya nung shilem agir – PUBC aser FCC asayartem den aroki agiba noksa ka yangi angur. (Kohima, March 16)

Kohima, March 16 (TYO): Nagaland School Education & SCERT Minister, Yitachu-i 7 buba Silver Cup Twenty20 (T20) Cricket Tournament Kohima kübok Jakhama Local Ground nung tanü, Bodbar nü lapoktsüogo.
Nepali Baptist Church Kohima Youth Department (NBCK YD)-i ‘Peace & unity through cricket’ omen nung ajemdaker tan asayamong ya ayonga lir.
“Asayartemi yimya tajungtiba benshia asayatsü ajungshir. Bendanga agütsüba ajanga dang asayar shiai takok tulu angutsü,” ta tongti tesemdanger, Yitachu-i tanü asayamong lapokba sentong nung tajungshiba olen ka metetdaktsü.
“India linük nung Khristan tamangba yimsü amanger ajemaka, Nagaland nungbo Khristanpur timba lir. Ajisüaka, nütsüng yongsük timba alibaji tanüngba tamangba yimsü amangertem ajemrepa ayutsü temeten angur masu. Aji oda, tamangba yimsü balala benshir rong nung lenji otep aser amalitepbaren aliba ajanga dang lokti nung yimjung aser terenlok alitsü,” ta pai lemsatep.
Taküm agi küm 7 buba tashi Silver Cup asayamong ayongba ajanga nüburtem tali lungjemdaktsüba atema NBCK YD dang pelaba olen ka tongti tesemdangeri lemsatepa liasü.
Kohima nungi telok 16, Dimapur nungi telok 3 aser Mokokchung aser Assam kübok Diphu na nungi telok kaka densema, ajak agi telok 24-i anogo 10 tashi toktepa asayaba sülen iba asayamong final tan March ita 26 nü asayatsü renema lir.
Ano külen, tanü asayamong tetenzükba asaya nung Police Union Baptist Church (PUBC) teloki wicket 3 agi Friends Cricket Club (FCC) telok madak takok ngua liasü.
Tanü tanabuba asaya nung Diphu XI telokia runs 239 agi asayamong tayonger, NBCK YD telok madak ajemshia takok angu.
March 17 nü asaya yamai alitsü:
1. FHCC vs Kohima Hornbills ‘B’ @ 7am
2. Kohima Knights vs Street Boys Wokha @ 10am
3. Sparks CC (Dmp) vs Merhülietsa CC @ 1pm