Yitachu-i lanurtem dang Naga nunger lokti nung temelenshi adokdaktsütsü ayongzük

Pfutsero, November 21 (TYO) : Honibarnü School Education & SCERT Minister, Yitachu-i Chakhesang nunger lanur dang lokti nung temelenshi bener arutsü aser Naga nunger lokti tejakleni bener aotsü ayongzük.

“Asen tetsü-tebou mapang Naga nungerji mangko bushirtem liasü aser parnok nüngtugu akümtsü mechi parnok tsüngda mangko agiteptsü merang, saka tanü putu nungbo lanurtemi terenlok aser azükaru angutsü atema nübortem tangatetba melenshitsütsüla” ta Yitachu-i ashi.

Baptist Theological College Pfutsero nung Chakhesang Youth Front (CYF) 9 buba Lokti Mungdang alidang Yitachu-i iba tayongzükba o jembia liasü.

“Naga nunger litsü peria lir anungji asenok kecha agia anünga mali, saka asenok atema khuret tulubaji asenok timtem melii sen aginüba tangatetba lir. Lanurtemji tarutsü putu lennirtem lir anungji Naga nunger lanurtemi lokti nung nübortem tangatetba melenshidaktsütsü merangtsüla. Sorkar mapa dak dang teimla ayuba tangatetba ya agientsüla aser pei sasa mapa inyaka chuiyunga-jema alitsü merangtsüla” ta paisa ayongzük.

Sorkar mapa inyaker lakh 1.40 nem itasen agütsüdang state sorkar sen timbaka endoktsüsa akümer. Ano zünger mapa mongui alir nisung 30,000 nem sorkar mapa agütsüra, state sorkar mapa inyaker lakh 1.70 akümtsü aser parnok nem itasen agütsüba ajanga tanga mapa inyaktsü atema sen manüngtsü. Anungji zünger mapa mongui aliba lanurtemi industries aser commerce tsütsü pei sasa mapa inyaka taküm liyonga aotsü merangtsüla, ta paisa ayongzük.

Nagaland state ngur küm 50 süiaka, tanü tashi asenoki tangar memenep. Iba ya atema Nagaland nung yimten tsütsü temulungtetba takang ka nüngdaker aser iba jagi sorkar ketdangsübaren nung temelenshi bener arutsü aser asen state tejakleni aotsü, ta Yitachu-isa shisem.

Paisa Naga yimtem tebilemtsü atema jembidang ashiba agi, Naga nunger melongjemba agi iba khuret küm aika mebenteteti arur. Asenok melongjemra chichiba telemtetba ka magitettsü.

Kin o kin taginüba nung ajemdaker Naga yimten tebilemtsü mebentettsü, saka iba tangatetba jagi khuret ang tuluba kümdaktsütsü, ta Yitachu-isa ashi.

Iba sentong nung mendenji CYF Advisor Welete Kapfo liasü, Pfutsero Town Baptist Church pastor Rev. Dr. Neingupe Chiero-i temoatsü meshia sarasadem,  CYF president Zhopayi Nakro-i tir o jembi aser Chakhesang Public Organisation general secretary Kekhwengulo Lea-i tesentepertem pela agizük.